Өлүөхүмэ, Алдан, Нерюнгри, Ленскэй оройуоттарыгар 2024 сыл бүтүөр диэри 5000 дьиэни гааска холбуохтара. Саха сирин олохтоохторо учаастактарын гааска холбонуулара анал биэс сыллаах былааҥҥа олоҕуран ыытыллар, суруйар СИА промышленность министиэристибэтигэр сигэнэн.
Барыта 500 км гаас ситмин тардар былааннаахтар. «Гаас ситимин тутуу динамиката улаатар. Атырдьах ыйыгар 600 тахса гаас ситимэ тутулунна. Билигин «Сибиир күүһэ» Ковыкта – Чаянда учаастагар ситим тардыытын түмүктүүр түһүмэҕэр үлэ барар. Тутууга олохтоох «Сахатранснефтегаз» хампаанньаны кыттыһыннарар былааннаахпыт, оччотугар регион соҕуруу уонна арҕааҥы өттүгэр баар нэһилиэнньэлээх пууннары гаастааһыҥҥа үлэ тэтимириэ», — диэтэ миниистир Максим Терещенко.
