Өрөспүүбүлүкэ тыатын хаһаайыстыбатын министиэристибэтин дааннайынан, Саха сирин үгүс оройуоннарыгар аграрийдар тыа хаһаайыстыбатын култуураларын ыһаллар.
Туораахтаах култууралар 10 733 гектарга (былаантан 87%) ыһыллыбыттар: эбиэс – 7490 га, сэлиэһинэй – 1187 га, ньэчимиэн – 2010 га, озимай оруос – 45 га.
Эбии аһылык култууралара 18 899 гектарга (былаантан 58%) ыһыллыбыттар: биир сыллаах эбии аһылык – 6231 га, урукку сыллардааҕы элбэх сыллаах оттор – 12 273 га, быйылгы сыллааҕы элбэх сыллаах оттор – 394 га.
Хортуоппуй 5453 гектарга (былаантан 85%) олордуллубут. Аһаҕас буорга оҕуруот аһын 961 гектарга (былаантан 70%) олорбут.
2026 сылга өрөспүүбүлүкэҕэ тыа хаһаайыстыбатын култуураларын ыһар иэн 52,6 тыһыынча гектарынан былааннанар: туораахтаах култуураларга – 12,4 тыһ. га, эбии аһылыкка – 32,4 тыһ. га, хортуоппуйга – 6,4 тыһ. га, аһаҕас буорга оҕуруот аһыгар – 1,4 тыһ. га.
2026 сылга тыа хаһаайыстыбатын бородууксуйатын валовой хомуурун былааннаах кээмэйэ маннык: туораахтаах култууралар – 14 тыһ. туоннаҕа диэри, хортуоппуй – 76 тыһ. туоннаҕа диэри, аһаҕас уонна сабыылаах буорга оҕуруот аһа – 29,1 тыһ. туоннаҕа диэри.
Көрүллүбүт дьаһаллары олоххо киллэрии агропромышленнай комплекс бородууксуйатын оҥорон таһаарыы кээмэйин улаатыннарыыга туһуламмыт сыалы-соругу толорууга, Арассыыйа Федерациятын Бэрэсидьиэнэ Владимир Путин 2030 сылга диэри АПК бородууксуйатын оҥорон таһаарыыны 25%-тан итэҕэһэ суох улаатыннарар туһунан ыйааҕынан уонна СӨ Ил Дархана Айсен Николаев олохтоох оҥорон таһаарыыны сайыннарыыга туруорбут стратегическай соруктарын толорууга туһуланар.
