29 Тохсунньу 29.01
  • -48°
  • $ 73,82
  • 83,32

Саха сирэ Хэйлунцзян провинциятын кытта бииргэ үлэлээһинэ саҥа таһымҥа тахсар

16:52, 15 июня 2016
Текст:

Россия уонна Кытай икки ардыларыгар стратегическай суолталаах хардарыта бииргэ үлэлээһин саҥа түһүмэҕэ саҕаланар. Биллэн турар, дойду историятыгар бу көмүс буукубаларынан суруллар быһыы-майгы. Ити туһунан Егор Борисов уонна Хэйлунцзян провинциятын губернатора Лу Хао эттилэр.


Былырыын Владивосток куоракка ыытыллыбыт Илиҥҥи экономическэй форум кэмигэр саҕаламмыт кэпсэтиһиилэр суолталарын регионнар салайааччылара үрдүктүк сыаналаатылар. Губернатор Лу Хао эппитинэн, онуоха Дьокуускайга буолбут дьыалабыай бырагыраама улахан олугу уурбут. Бу бырагыраамаҕа Хэйлунцзян провинциятын 100-тэн тахса предпринимателэ кыттыбыт.

Егор Борисов бэлиэтээбитинэн, бизнес-бырайыактары көҕүлээһиҥҥэ, хамсатыыга өрөспүүбүлүкэ муниципалитеттара көхтөөхтүк кытталлар.

Баһылык уонна губернатор Россия уонна Кытай бырабыыталыстыбаларын икки ардыларынааҕы уочараттаах мунньаҕар чопчу этиилэри бэлэмниир наадатын ойуччу тутан эттилэр. Туох-ханнык иннинэ концессионнай сөбүлэһии чэрчитинэн хорҕолдьуну хостуур уонна Өлүөнэ өрүһү туоруур муостаны тутуу курдук инвестиционнай бырайыактар тустарынан кэпсэтии буолла. Ырытыһыы кэнниттэн салайааччылар чопчу коммерческай усулуобуйаны оҥорор туһунан быһаарыыны ыллылар.

«Доҕордуу сыһыан биир сомоҕо бырайыагынан бөҕөргүүрүн туһугар ити этиллибит икки боппуруоска көмөлөһөргө бэлэммит. Соруктарбыт тустарынан партия генеральнай сэкирэтээригэр Си Цзиньпиҥҥа тиэрдэр санаалаахпын», — диэтэ губернатор Лу Хао.

Егор Борисов Саха сирэ киллэрбит этиилэригэр болҕомтолорун иһин махтанна уонна «Азия оҕолоро» норуоттар икки ардыларынааҕы VI-с спортивнай оонньууга, быйыл балаҕан ыйыгар ыытыллар «Бриллиант нэдиэлэтэ» промо-турга ыҥырда.

0
0
29 января 29.01
  • -48°
  • $ 73,82
  • 83,32