Саха сирин HOTU x ELGA киберспортка хамаандата Counter-Strike 2 оонньууга Арассыыйа Куубагын ылары ситистэ. Күрэхтэһиилэр Москва куоракка атырдьах ыйын 24 -25 күннэригэр ыытылыннылар. Бу туһунан Ил Дархан Айсен Николаев ТГ-ханаалыгар иһитиннэрдэ диэн Саха сирэ суруйар.
«Саха сирин киберспортсменнара Counter-Strike 2 оонньууга Арассыыйа Куубагын ыланнар, үрдүк маастарыстыбаларын көрдөрдүлэр. Быйыл бэс ыйыгар Владивосток куоракка HOTU x ELGA хамаандата Арассыыйа чөмпүйэнээтигэр эмиэ бастаабыта. Маны таһынан биһиги хамаандабыт Москваҕа ыытыллыбыт Арассыыйа Куубагын финальнай матчтарын кыайдылар», — диэн Айсен Николаев биллэрдэ.
Арассыыйа Куубагар күүстээх спортсменнар уонна хамаандалар үс көрүҥҥэ күрэхтэстилэр: Dota 2, Counter-Strike 2 уонна Tekken 8. Dota 2 оонньууга Cybermos. bald dynasty Москва хамаандата бастаата, Tekken 8 оонньууга — Алексей Комиссаров (Higem). Оттон Counter-Strike 2 оонньууга Саха киберспортсменнара бастыҥнар кэккэлэригэр киирдилэр, иккискэ — Новосибирскай QUAZAR x 44 хамаандата, үһүскэ — Алтайтан LF0 хамаандата буоллулар.
