Тустуу аан дойдутааҕы түмсүүтүн (UWW) көҕүлээһининэн олунньу саҥата Турция киин куоратыгар тустуу национальнай көрүҥнэригэр кэмитиэт сүбэ мунньаҕа тэрилиннэ.
Онно Саха сириттэн хапсаҕай федерациятын бастакы вице-президенэ, көҥүл тустууга Россия эдэрдэргэ сүүмэрдэммит хамаандатын старшай тренерэ Петр Юмшанов уонна бу строкалар ааптардара ыҥырыллан кыттыыны ыллыбыт. Биһиги сүрүн сорукпутунан хапсаҕайы билиһиннэрии буолла. Сүбэ мунньахха аан дойду 20-чэ дойдутуттан сүүсчэкэ бэрэстэбиитэл кытынна.
Хапсаҕайы – тустуу национальнай көрүҥүн быһыытынан Петр Юмшанов билиһиннэрдэ. Кини кылгастык Саха сирин туһунан этэн туран, хапсаҕай төрүттэниитин, урукку историятын, билиҥҥи туругун уонна быраабылатын туһунан кэпсээтэ. Итиэннэ хапсаҕай көмөтүнэн саха бөҕөстөрө көҥүл тустууга Олимпийскай оонньууларга ситиһиилээхтик кытталларын санатта. Петр Петрович иһитиннэриитин форум кыттыылаахтара уонна UWW президенэ Ненад Лалович улаханнык сыаналаатылар. Ити курдук, тустуу национальнай көрүҥнэрин сайдыытыгар бэйэлэрин көрүүлэрин Казахстан, Украина, Иран, Монголия, Сенегал, Зимбабве, Кыргызстан, АХШ уонна атын дойдулар делегациялара билиһиннэрдилэр.
Форумҥа уруккуттан билэр дьоммун – Литваттан Гинтаутас Вилейтаны, Украинаттан профессор Геннадий Арзютовы, Индияттан Омармухтар Тамболины, Марокко тустууга федерациятын президенэ Мускут Фуады, Казахстантан Марат Шамшинуровы уонна, биллэн турар, бу иннинэ Москваҕа уонна Лас Вегаска көрсөн сэһэргэспит киһибин – UWW президенэ Ненад Лаловиһы кытта көрсөн, санаам көтөҕүлүннэ. Манна сыһыары тутан эттэххэ, аан дойду тустуутун салайааччыта Ненад Лалович саалаҕа киирээт даҕаны, аан бастаан биһиги Петр Юмшановпытыгар чугаһаан кэлэн истиҥник кууһан эҕэрдэлээбитигэр, мин биир дойдулаахпынан киэн тутта санаабытым. Ити курдук, Петр Петровичка Тустуу аан дойдутааҕы түмсүүтүн бюротун чилиэннэрэ, олимпийскай чемпион Ахмет Айык, Цено Ценов, Ахрол Рузиев доҕордуу сыһыаннаахтарын көрөн итэҕэйдим.
