От ыйын 24 күнүгэр «За языки РФ» уопсастыбаннай платформа тэрийиитинэн Россия тылларын харыстааһыҥҥа аналлаах бастакы онлайн конференция буолан ааста. Тэрээһиҥҥэ дойду араас регионнарыттан 9 киһи дакылаат аахта. Олор истэригэр саха сириттэн Сахалыы Бикипиэдьийэни төрүттээбит Николай Павлов-Халан уонна юрист, блогер Сандаара Кулаковская.
Юрист идэлээх Сандаара Кулаковская саха тылын сайыннарыыга бэйэтин бырайыактарын туһунан кэпсээтэ. Сандаара оҕолорго анаан быраап өйдөбүллэрин туһунан видеороликтары устарын, оҕолорун көрөн олорор ийэлэргэ юридическэй куурустары ыытарын туһунан кэпсээтэ. Маны таһынан кини төрөөбүт тылы харыстыырга дьоҥҥо наадалаах информацияны сахалыы тиэрдии улахан оруоллааҕын, оҕоҕо тылы төрөппүттэн тиэрдии ордук дөбөҥүн, төрөөбүт тылынан толору билбэт киһини күлүү-элэк оҥостортон туттунууну ыйда.
Николай Павлов – Халан Арассыыйа араас норуоттарын Биики бырайыактарын холобурдарыгар хайа да эмсэҕэлээбит тыллаах омук цифровой эйгэҕэ бэйэтин миэстэтин булуон сөбүн сырдатта. Ол курдук Биики сонуннар араас сиргэ тарҕанан олорор омуктары түмүө оттон ох тыллар Биикилэрэ хас биирдии омук төрүт тылынан уос номоҕо буолбут тылларын, кэпсээннэриттэн быһа тардыыларын үллэстиигэ олук буолуо этэ диэтэ.
«За языки РФ» уопсастыбаннай плаформа Россия кыттыгас бэрэссэдээтэлэ Римма Гумирова конференция кыттыылаахтара дойду тылларын харыстыырга бииргэ үлэлиир баҕалаахтарын этэн туран, инникитин киэҥ хабааннаах үлэ тахсарыгар олук ууруллубутун эттэ.
Дакылааттар видеоларын сотору уопсастыбаннай платформа социальнай ситимнэрин сирэйдэригэр көрүөххэ сөп буолуо. Уопсастыба активистара бу курдук хабааннаах араас кыһалҕалары ырытар тэрээһиннэри кэмиттэн кэмигэр ыытар баҕалаахтар. Аныгыскы кэпсэтии атырдьах ыйын 14 күнүгэр буолуо.
