15 От ыйа 15.07
  • 27°
  • $ 87,74
  • 95,76

Россия күнэ. Бүлүү куоратыгар күн чаҕылыччы тыкта, дьон-сэргэ үөрдэ-көттө

09:59, 12 июня 2020
Текст:
Читайте нас на
Яндекс Новости
ЯДВ

Бүгүн — Россия күнүн — Ытык Бүлүүбүт дьоно-сэргэтэ, айылҕата уруйдуу-айхаллыы көрсөллөр. Хас да күннээх күүстээх ардахтар кэннилэриттэн күммүт сандаара тыкта, халлааммыт былыта суох ып-ыраас, тулабыт барыта күөҕүнэн чэлгийэр. Олохтоохтор үөрэллэр, араас онлайн тэрээһиннэргэ кытталлар.


Бу дьоһун суолталаах бырааһынньыгы көрсө тапталлаах Бүлүү куораппыт бары болуоссаттара, сквердэрэ кэрэчээн сибэккилэринэн симэнэн, самаан сайын кэлбитин тыыннаах туоһута буолан, үөрүүнү, эрэли, үтүөнү түстүүргэ дылылар.

Дойду үрдүнэн коронавирус дьаҥа турбутунан, Бүлүүгэ эмиэ бүгүҥҥү Россия күнүн бырааһынньыга онлайн киэбинэн ыытыллар. Ол курдук Бүлүү к. баһылыга Нюргустан Афанасьев видеороликка уһуллан, бу улахан суолталаах бырааһынньыгынан дьонугар-сэргэтигэр истиҥ эҕэрдэтин, үтүө баҕа санаатын тириэртэ.

Бүлүү куорат төрүттэниитин туһунан видеоролигы олус интэриэһиргээн көрүөххэ, куораппыт историятыгар билиибитин-көрүүбүтүн өссө хаҥатыахпытын сөп эбит. Итини сэргэ Россия күнүгэр аналлаах викторина ыытылла турар. Кыайыылаахтар бириистэринэн наҕараадаланыахтара диэн тэрийээччилэр этэллэр.

Бу Россия күнүгэр аналлаах онлайн-тэрээһиннэри Бүлүү к. дьаһалтата «Алгыс» сынньалаҥ киинин уонна П.Х. Староватов аатынан Бүлүүтээҕи кыраайы үөрэтэр музей үлэһиттэрин кытта бииргэ тэрийэн ыыталлар.

Следите за самым важным и интересным в Telegram-канале и WhatsApp-группе ЯСИА