Саха сиригэр өрүстэр быйыл эрдэ эстиэхтэрэ. Өлүөнэ өрүскэ, Алдан уонна Амма аллараа тардыыларыгар муус харыыта тахсыан сөп.
«51 учаастакка, ол иһигэр Өлүөнэ өрүс тардыытыгар 33, Алдаҥҥа – 9, Аммаҕа – 9, Тааттаҕа, Халымаҕа, Бүлүүгэ 1 сиринэн муус харыыта үөскүүрүн сабаҕалыыбыт. Ити түмүгэр 24 муниципальнай тэриллиилэргэ 121 нэһилиэнньэлээх пуун ууга барар кутталлаах. Ыйыллар түөлбэҕэ социальнай суолталаах 20, экономика 17 эбийиэктэрэ бааллар», — диэн Уһук Илин уонна Сибиир федеральнай уокуруктар биэдэмистибэлэр икки ардыларынааҕы мунньахтарыгар вице-премьер Виктор Омуков бэлиэтээтэ.
Регионнааҕы таһымнаах тыҥааһыннаах быһыы-майгы буолуон сөп.
Бүгүҥҥү туругунан өрөспүүбүлүкэ сиригэр-уотугар 46 гидротехническэй тутуу баар. Алта өрүскэ: Өлүөнэҕэ, Халымаҕа, Алдаҥҥа, Аммаҕа, Нүүйэҕэ уонна Токкоҕо мууһу хараардыыны уонна эрбээһини былаанныыллар.
Муус устарга өрөспүүбүлүкэ 10 оройуонугар команднай-штабнай үөрэхтэри ыытыахтара.
16 тыһ. 545 киһилээх, 2 тыһ. 169 тиэхиньикэлээх, 41 авиа тиэхиньикэлээх бөлөх тэрилиннэ. Быыһыыр сулууспа пилота суох көтөр үс аппараатын бөлөх туттуоҕа.
«Халаан содулун туоратыыга 200 мөл.солк. суумалаах үп-харчы резервэтэ бырабыыталыстыбаны кытта оҥоһуллунна, 137 мөл. тахса солк. сыаналаах материальнай ресурса мунньуллунна, муус харыытын эһэр веществоны атыылаһыыга 10 мөл.солк. көрүлүннэ, нэһилиэнньэни эрдэттэн сэрэтиигэ ураты улахан болҕомто ууруллар», —диэтэ вице-премьер.
