Ил Дархан өрөспүүбүлүкэ устудьуон этэрээттэрин бастыҥ байыастарыгар бириэмийэ туттарар туһунан Ыйаахха илии баттаата.
Өссө 2015 сыл алтынньытыгар Егор Борисов өрөспүүбүлүкэтээҕи устудьуон этэрээттэрин сүлүөттэригэр этэн турардаах: «Устудьуон этэрээтэ — оҥорон таһаарыыга уонна экономикаҕа эрэ буолбакка, кадры бэлэмнээһиҥҥэ эмиэ улахан күүс буолар», — диэн. Онно кини бырабыыталыстыбаҕа бу хайысханы өйүүргэ сорудах биэрбитэ.
100 тыһ.солк. суумалаах бириэмийэни сыл аайы үс номинациянан туттарыахтара:
— СӨ устудьуоннар этэрээттэрин бастыҥ хамандыыра;
— СӨ устудьуоннар этэрээттэрин бастыҥ хамыһаара;
— СӨ устудьуоннар этэрээттэрин бастыҥ байыаһа.
Куонкуруска кыттааччыны ыччат уопсастыбаннай тэрилтэлэрэ туруораллар. Кыттааччы орто эбэтэр үрдүк үөрэххэ истэн үөрэнэр устудьуон буолуохтаах.
