28 Кулун тутар 28.03
  • -13°
  • $ 92,26
  • 99,71

Промышленность тэрилтэлэрэ олохтоох эдэр дьону үлэҕэ ыла сатаабаттар

10:31, 18 апреля 2016
Текст:
Читайте нас на
Яндекс Новости
ЯДВ

Профессиональнай үөрэхтээһин, каадыры бэлэмнээһин уонна аттаран туруоруу миниистирэ Михаил Присяжнай буолан ааспыт брифиҥҥэ үлэни биэрээччи үөрэҕи саҥа бүтэрээччи иһин социальнай эппиэтинэһи сүгүөн баҕарбатын туһунан чиҥэтэн эттэ.


Бүгүҥҥү ааҕыынан промышленнай тэрилтэлэргэ 700 оробуочай каадыр наада. Итинтэн 667-тин министиэристибэ бэлэмнээн таһаарар кыахтааҕын биэдэмистибэ отделын специалиһа Ньургуйаана Соколова бэлиэтиир.

Кэлиҥҥи сылларга бөдөҥ промышленнай компаниялар олохтоох каадыры үлэҕэ ылаллара биллэ аҕыйаабыт. 2014 сылга идэлээх киһиэхэ наадыйан 202 миэстэҕэ сайаапка түһэрбит эбит буоллахтарына, ити көрдөрүү 2015 сылга икки бүк аччаабыт.

Үлэни биэрээччи киһи үлэлии хааларыгар сөптөөх, табыгастаах усулуобуйаны тэрийиигэ дьулуспат. Олохтоохтору үлэҕэ ылар да буоллахтарына, промышленность барар сириттэн эрэ ылаллар.

Михаил Присяжнай этэринэн, үлэни биэрээччилэр атын регионнартан ваахтанан үлэлии кэлэр чэпчэки күүһүнэн үлэ миэстэтин толороллор.

«Тэрилтэлэр социальнай партнер буолалларыгар, олохтоох каадыры үлэҕэ ылалларыгар, ваахтанан үлэни хааччахтыылларыгар ыҥырабыт. Ол да үрдүнэн маныаха хамсааһын баар диир билиҥҥитэ эрдэ», — диир кини.

2008 сылтан бэттэх үлэ миграннарын тардыы көрдөрүүтэ үрдүү турар. Ити 2014 сылга 16 тыһ. киһиэхэ диэри тиийдэ.

Холобур көмүс хостооһунугар 2015 сылга 52 тыһ.тэрилтэ баара, онно 8,6 тыһ. киһи үлэлиирэ, итинтэн 5 эрэ тыһыынчата Саха сирин дьоно этилэр.

Миниистир этэринэн, тустаах биэдэмистибэ олохтоох дьоҥҥо үлэ булар эрэ буолбакка, кинилэр онно уһун кэмҥэ үлэлии хаалалларын туруулаһар. Холобур, үлэҕэ киирбит киһи икки-үс сылынан муҥурдаммакка, эбии үөрэнэн, идэтин уларытан, квалификациятын үрдэтэн уһуннук үлэлиирэ ситиһиллиэхтээх. Онуоха көрсөр ороскуотун судаарыстыба толуйуон сөп.

Следите за самым важным и интересным в Telegram-канале и WhatsApp-группе ЯСИА