18 От ыйа 18.07
  • 20°
  • $ 88,09
  • 96,3

Прокопий Латышев: Үөдэйдэр биэлсэрэ суох олоробут

11:14, 01 февраля 2016
Текст:
Читайте нас на
Яндекс Новости
ЯДВ

— Прокопий Петрович, дьэ, билиһиннэр эрэ, салгыы туох тутуулары ыытан эрэҕит?

— Роман Филиппов сүүрэн-көтөн туттарбыт хочуолунайа үлэҕэ киирэн, күн бүгүн 57 ыал кииннэммит ититэр ситимҥэ холбонон олорор. Ити кэннэ култуурунай-спортивнай комплекс дьиэтэ үлэҕэ киллэриллибитэ. Ааспыт 2015 сылга «Үтүө дьыала XXI үйэҕэ» хамсааһын көмөтүнэн 35 миэстэлээх оҕо саадын тутуутун саҕалаатыбыт. Быйыл көҥдөйүн бүтэриэхтээхпит, тутуутун матырыйаала кэлэн сытар, эһиил үлэҕэ киллэрдэрбит диибит. Итини сэргэ дьаһалтабар хаһаайыстыбаннай ньыманан гараас туттан эрэбин. Тутуутун матырыйаалын, маһын бэлэмнээбитим. Быйыл былааммытынан түөрт кыбартыыралаах толору хааччыллыылаах уопсай дьиэни тутуохтаахпыт.

— Тыа хаһаайыстыбатын салаатыгар туох уларыйыылар баалларый?

Оскуолабыт агрохайысхалаах, ону киллэрэн туран сүөһү, сылгы иитиитинэн дьарыктанар  биэс бааһынай хаһаайыстыбалаахпыт. Оттон, хортуоппуй үүннэриитинэн И.И. Григорьев дьарыктанар. Үүппүтүн Мохсоҕоллоохтооҕу  «Хаҥалас-Ас» ТХПК туттарабыт, былааммытын сыллата толоробут. Хороҕор муостаах уопсай ахсаана 250 төбө, былырыын-иллэрээ сыл  ынахпыт ахсаана аҕыйыы сылдьыбыта. Быйыл ититэр ситим киллэриллэн уонна ынах уулуур уута баар буолан, ахсааны көҕүрэппэттэрэ буоллар диэн баҕа санаалаахпын. Үлэлээбитим маҥнайгы сылыгар ыҥырыы таһаара сылдьыбытым, эдэр ыалларга ынах атыылаһар буоллаххытына 50% төлүүбүн диэн. Ол ыҥырыыбын эдэрдэр сэҥээрбэтэхтэрэ,  биир саастаах киһи атыыласпыта, киниэхэ төлөспүтүм. Быйыл «Ат Дабааҥҥа» сүөһү куйаастан хаххаланарыгар сарай оҥоруутун саҕалаабыппыт, быйыл бүтэриэхпит.  Салгыы «Ой Мурааҥҥа» оҥоруохпут, бу олус наадалаах тутуулар буолаллар.

— Аны нэһилиэк олоҕор киириэххэ, килиэпкитин бэйэҕит үтэҕит дуо?

Кэлиҥҥи икки сылга бэкээринэбитигэр эрэйи көрбүппүт. Былырыын Е.Е. Филиппов килиэп астааһыныгар ылсыбыта, онно дьаһалта аатыттан көмөлөспүппүт. Онон нэһилиэнньэ килиэбинэн хааччыллыыта үчүгэй, өссө Сиинэҕэ илдьэн атыылыыр. Бурдугун Покровскайтан аҕалар, онон килиэбин сыаната ыарахан, биир бухааҥката — 45 солк. Кулун тутар ыйга 15 туонна бурдук кэлиэҕэ, оччоҕо килиэп сыаната 40 солк. буолуоҕа.

— Оттон эминэн хааччыллыы хайдаҕый? ФАП үлэтин туһунан сырдат эрэ.

Үөдэй олохтооҕо А.В. Латышева эмп аҕалан атыылыыр. Дьаһалта киниэхэ утары баран, эттэҕинэ эмин аҕалан биэрэбит. Эмин сыаната чэпчэки, балыыһаҕа эмп олох аҕыйах кэлэр. Билиҥҥитэ биэлсэрэ суох олоробут. Дьиҥэр, үлэһит кэлэрэ буоллар, дьиэ- уот баар.

Нэһилиэк ыалларын аҥаара кииннэммит ититэр ситимҥэ холбонон олорор, быйыл эбии төһө ыалы холбуурга былаанныыгыт?

— ОДьКХ Хаҥаластааҕы филиалыгар бэҕэһээ сайаапкалары ыыттыбыт. Онон аны сайын 17 ыалы холботорго былаанныыбыт. Итиннэ даҕатан эттэххэ, аҕыйах хонуктааҕыта улуус баһылыгар Г.Ю. Алексеевка киирэ сылдьыбытым. Гаврил Юрьевич: «Үөдэй ыалларын 100 бырыһыан кииннэммит ититэр ситимҥэ холбуурга диэн бырагыраамаҕа киллэрэн олоробут», — диэбитэ.

Түмүктээн эттэххэ, ыаллар тупсаҕай олохтонуулара кииннэммит ититэр ситимҥэ холбонууну кытта ыкса сибээстээх. Кииннэммит ситим баар буоллаҕына, кэтэх дьиэни толору хааччыллыылаах оҥорор бэрт судургу. Ити чааһыгар Үөдэйгэ барыта баар, табылыннар ханнык.

Хаартыскаҕа: Нэһилиэк баһылыга Прокопий Латышев уонна ОДьКХ кылаабынай инженерэ Дмитрий Николаев үлэни былаанныыллар

Следите за самым важным и интересным в Telegram-канале и WhatsApp-группе ЯСИА