29 Тохсунньу 29.01
  • -48°
  • $ 73,82
  • 83,32

От ыйын 1 күнүттэн биэнсийэни “Мир” каартаҕа түһэриэхтэрэ

14:30, 26 июня 2017
Текст:

Бу сыл от ыйын 1 күнүн кэнниттэн биэнсийэҕэ саҥа тахсар дьон биэнсийэлэрин тута “Мир” каарта нөҥүө ылар буолуохтара. Оттон атын биэнсийэлээхтэр бары 2020 сыл от ыйын 1 күнүгэр диэри көһүөхтээхтэр.


Дойду бэрэсидьиэнэ Владимир Путин ыам ыйыгар илии баттаабыт сокуонугар этиллэринэн, бүддьүөт үлэһиттэрэ уонна биэнсийэлээхтэр “Мир” каартаҕа сыыйа көһүөхтээхтэр. Бааннар от ыйын 1 күнүттэн каартаны үлэлэтэр усулуобуйаны тэрийиэхтээхтэр. Холобур, банкоматтар, терминаллар каартаны харгыһа суох аһардыахтаахтар. Бу күнтэн бүддьүөт үлэһитэ “Мир” каартаны ылан, хамнаспын онно түһэртэрэбин диэтэҕинэ, бааннар аккаастыыр бырааптара суох.

Бүддьүөт эйгэтин үлэһиттэрэ бары 2018 сыл от ыйын 1 күнүгэр диэри “Мир” каартаҕа көһөн бүтүөхтээхтэр. Ол эбэтэр, лоп курдук биир сыл иһигэр. Оттон биэнсийэлээхтэр билигин тутта сылдьар каарталарын болдьоҕо бүтүөр диэри туһаныахтарын сөп, ол эрээри 2020 сыл от ыйын 1 күнүттэн хойут буолуо суохтаах.

“Мир” каарта – тас дойдулар экэниэмикэлэриттэн, бэлиитикэлэриттэн тутулуга суох, национальнай төлүүр систиэмэ бородууктата буолар. Бастакы пластиковай каарталары 2015 сыл ахсынньытыгар таһаарбыттара. Аатын уонна логотибын бүттүүн куоластаан быһаарбыттара.

Дойду бары сүрүн бааннара “Мир” каарталары туһаныыга таһаардылар. Холобур, Сбербааҥҥа электроннай чибынан көмүскэллээх, мобильнай бааннаах каарта баар. Бу каартаны туһанарга сылга 750 солк. төлүүгүн (эһиилгиттэн 450 солк. буолар). Сбербаан “Спасибо” бырагырааматыгар киирсэр, ол аата атыыласпыт суумаҕыттан 0,5%-на, партнердартан (холобур, Sela, “Роснефть”) 10%-на бэйэҕэр төннөр. Оттон биэнсийэлээхтэр каартаны босхо туһаныахтара.

Билигин 5 мөлүйүөнтэн тахса каартаны оҥорон таһаардылар. 356 баан бу бырагыраамаҕа кыттарга бэлэмин биллэрдэ, ол иһигэр 75 баан бэйэтэ “Мир” каартаны таһаарда, ону тэҥэ, 181 баан банкоматтарыгар, терминалларыгар туттуохха сөп.
Оҥорбут дьон эрэннэрэллэринэн, каарта аан дойдутааҕы стандарка эппиэттиир уонна көмүскэллээх. Тас дойдуларга эмиэ туһаныахха сөп.

“Почта Баан” эмиэ кыттыһар

Саха сиригэр бүддьүөт үлэһиттэрин, биэнсийэлээхтэри “Мир” каартаҕа көһөрөргө үлэлиир бөлөх тэрилиннэ, “дорожнай каарта” оҥоһуллуохтаах.

“Бүддьүөт тэрилтэлэрин икки ый иһинэн “Мир” каартаҕа көһөрүөхтээхпит” диэн Ил Дархан Егор Борисов сыал-сорук туруорбута. Өрөспүүбүлүкэҕэ “Сбербаан”, «Газпромбаан», «ВТБ 24», «Россельхозбаан», «Росбаан» уонна «Алмаасэргиэнбаан» каартаны таһаардылар уонна толору хааччыйаллар. Ону тэҥэ, “Почта Баан” эмиэ кыттыһар. Оччотугар дьон 24 улууска, 37 почта салаатыгар тиийэн бу каартанан туһанар кыахтаныахтара. Бу ордук Уһук Хоту улуустарга көмөлөөх буолуо.

Дьоҥҥо-сэргэҕэ өйдөтөр үлэ күүскэ ыытыллыахтаах. Арҕааҥы дойдулартан тутулуга суох буолар туһуттан маннык миэрэ ылыллыбытын дьон өйдүөхтээх, өйүөхтээх.

0
0
Тутаах тыллар
29 января 29.01
  • -48°
  • $ 73,82
  • 83,32