СӨ айылҕа харыстабылын министиэристибэтин пресс-сэкирэтээрэ Анна Налимова «Чыычаахтары аһат» акция Орто Халыма улууһугар ураты сэргэхтик тэриллибитин иһитиннэрдэ.
Тэрээһиҥҥэ Ойуһардаах, Сыбаатай, Өлөөкө Күөл, Налимскай, Сылгы Ыытар, Орто Халыма оскуолаларын үөрэнээччилэрэ, «Саһарҕа» (Орто Халыма), «Кэскил» (Налимскай), «Туллукчаана» (Өлөөкө Күөл), «Ладушка» (Ойуһардаах) оҕо саадын иитиллээччилэрэ ордук көхтөөхтүк кыттыбыттар.
«Улуустааҕы айылҕа харыстабылын иниспиэксийэтин кытта учууталлар, оҕо саадын иитээччилэрэ, предпринимателлэр кыттыһан викториналары, уруһуй куонкурустарын, оонньуулары тиһиктээхтик ыыттылар. Үөрэнээччилэр үлэ уруогар чыычаахтар уйаларын оҥорбуттар. Кырачааннар айылҕа уонна чыычаахтар тустарынан видеороликтары сөбүлээн көрбүттэр. Маны сэргэ, куораттааҕы бибилэтиэкэ кэлэктиибэ госиниспиэктэрдэри кытта чыычаахтар уйаларын быыстапкатын тэрийбиттэр», — диэн кэпсиир Анна Валерьевна.
«Кормушка-2016» куонкуруска 52 кыттааччы чыычаах уйатын, аһыыр холбуйатын арааһын оҥорон аҕалбыт. Киирбит оҥоһуктартан улуустааҕы айылҕа харыстабылын иниспиэксийэтин үлэһиттэрэ ураты харыстанар сиргэ-уокка илдьиэхтээхтэр, ордугун оскуолалар, оҕо саадын, дьон олорор дьиэтин тастарыгар ыйыахтаахтар. Онтон куонкурус уопсай түмүгэ муус устар 1 күнүгэр – Чыычаахтар күннэригэр — биллиэхтээх.
