„Созвездие Колымы“ диэн ааттаах вокальнай-инструментальнай ансаамбыллар куонкурустарыгар куорат орто оскуолатын оҕолорун уонна учууталларын „Scool Мix“ коллектива, Орто Халыматааҕы „Спектр“ оҕону сайыннарар киинин иитиллээччилэрин „Аккорд“ коллективтара, Сыбаатай бөһүөлэктэн „Күрүлгэн“ уонна Өлөөкө Күөлтэн „Түгэн“ ансаамбыллар араас кэм ырыаларын толордулар.
Саха сирин бастакы президенэ М.Е.Николаев олохтообут „Музыка для всех“ бырайыагынан оскуолалар музыкальнай аппаратуранан хааччыллан эрэллэр. Ол түмүгэр оҕо араас инструмеҥҥа оонньуура үксээтэ. Ону бу күн дьэҥкэтик көрдүбүт, сэҥээрэ иһиттибит. Оттон тыа сирдэриттэн кэлбит ансаамбыллар ааспыт кэминээҕи ВИА-лары сөргүтэн, бары даҕаны дьиэ кэргэн музыкальнай династияларын салҕааччылара буолалларын билиһиннэрдилэр.
Холобур, Сыбаатай „Күрүлгэн“ ВИА-тын туһунан аҕыннахха, бу аан маҥнай 1974 сыллаахха „Кэскил“ диэн аатынан тэриллибит ВИА суолун салҕааччынан буолар. Оччолорго музыкальнай инструмены диэн ылбычча булбатын. Онон уолаттар гитара струнатын, звукоснимателин почтанан сакаастаан, корпуһун маһынан бэйэлэрэ уһаммыттар. Оччолорго оһох оттооччунан үлэлиир кырдьаҕас эбээ В.Н.Антипина ынах тириитин таҥастаан биэрбитин тиирэн барабаан оҥостубуттар. Дьэ, бу курдук кэрэҕэ баҕалаах уолаттар норуокка киэҥник биллэн, оройуоҥҥа бастыҥ ВИА аатын ылары ситиспиттэрэ, нэһилиэк аайы күүтүүлээх ыалдьыт буолбуттара.
Оттон бүгүҥҥү киэһэҕэ оччотооҕу уолаттар сиэн бырааттара, оҕолоро түмсэн, ВИА-ны хат сөргүтэн, музыка хаһан да сүппэтин, тыыннааҕын туоһулаатылар.
Куонкурус аата куонкурус, кыайыылааҕы быһаарыы долгутуулаах түгэнэ үүннэ. Дьүүллүүр сүбэ быһаарыытынан, III истиэпэннээх лауреат аатын куорат орто оскуолатын оҕолорун уонна учууталларын „Scool Мix“ коллектива (салайааччы Виталий Олесов), II истиэпэннээх лауреат аатын „Аккорд“ оҕо коллектива (салайааччы Владимир Киприянов), I истиэпэннээх лауреат аатын Сыбаатайдааҕы „Күрүлгэн“ ансаамбыл (салайааччы Альберт Слепцов) ыллылар, оттон Гран-при хаһаайынынан Өлөөкө Күөллээҕи „Түгэн“ ВИА (салайааччы Аркадий Созонов) буолла.
Кыайыылаахтар 30 тыһыынча суумалаах сертификатынан наҕараадаланнылар, оттон лауреаттар эмиэ харчынан бириэмийэ тутан үөрдүлэр-көттүлэр. Хас биирдии коллективка бэлиэ кубок туттарылынна.
Онон бу күн бары даҕаны дуоһуйа сынньанныбыт, музыка тыыннааҕын толору итэҕэйдибит. Бу үйэҕэ бастакытын ыытыллыбыт куонкурус-фестиваль үтүө үгэскэ кубулуйан, салгыы сайдарыгар баҕара хааллыбыт.
