Бастакы вице-премьер Дмитрий Садовников бу сарсыардатааҕы суһал ыстаап күннээҕи иһитиннэриитин кэмигэр Горнай Бэс Күөлүгэр, Томпо Ударнигар, Уус Алдан Кылаайытыгар, Нам Салбаныгар, Үөһээ Бүлүү Далырыгар, Хомустааҕар, Дүллүкүтүгэр уот суоһуур куттала баарын эттэ. Кини бэҕэһээ көмөҕө кэлбит Илиҥҥи байыаннай уокурук инженернай ротатын байыастара Горнай улууһугар түспүттэрин, салгыы Үөһээ Бүлүүгэ барыахтарын эттэ.
«Буойаһынан иһэр тиэхиникэлэрэ икки сиринэн аттарыллыа», — диэтэ Садовников.
Өрөспүүбүлүкэ үрдүнэн 178 ойуур уота баар, итинтэн 60нун умуруораллар. Баһаарга 2635 киһи, 356 тиэхиникэ үлэлиир. Оборона, ЫБММ министиэристибэлэрин сөмөлүөттэрэ Хаҥалас, Горнай, Өлүөхүмэ улуустарыгар үлэлээтилэр. Дмитрий Садовников иһитиннэрбитинэн Өлүөхүмэ улууһун сорох баһаардара зондировщик-сөмөлүөт көмөтүнэн умуллубуттар.
Бэҕэһээ, атырдьах ыйын 4 күнүгэр Саха сиригэр Ан-12 байыаннай-транспортнай авиация икки сөмөлүөтэ кэлбитинэн 106 Илиҥҥи байыаннай уокурук инженернай ротатын байыастара кэлбиттэрэ.
