Бэҕэһээ Мэҥэ Хаҥалас улууһун Төҥүлү нэһилиэгин «Олимпионик» уһуйаана уонна Хотугулуу-Илиҥҥи бэдэрээлинэй үнүбэрситиэт АБ Хотугулуу-Илиҥҥи норуоттарын тылларын уонна култуураларын үнүстүүтэ бииргэ үлэлэһии сөбүлэҥин түһэристилэр. Сөбүлэҥ чэрчитинэн Лидия Манчурина сэбиэдиссэйдээх саха тылын истилиистикэтин уонна нууччалыы-сахалыы тылбаас хаапыдыратын уһуйааччылара бу оҕо саадын иитээччилэрэ оҥорор тылбаастарыгар сүбэ биэрэргэ, сыанабыл оҥорорго уонна иитээччи сахалыы тылын-өһүн тупсарарга аналлаах куурус ыытарга бэлэмнэр.
Саха тылын сайдыытыгар анаммыт дуогабарга Мэҥэ Хаҥалас улууһун Төҥүлү нэһилиэгин «Олимпионик» уһуйаанын дириэктэрэ Галина Стручкова уонна Хотугулуу-Илиҥҥи бэдэрээлинэй үнүбэрситиэт АБ Хотугулуу-Илиҥҥи норуоттарын тылларын уонна култуураларын үнүстүүтүн дириэктэрэ Гавриил Торотоев илии баттаатылар.
Хаартыска: Марфа Сидорова
“Төрөөбүт тыл туһугар, кэнчээри ыччат туһугар уус-уран тылбааска эмиэ үлэлэһиэхпит. Үөрэх саамай бастакы таһымыгар – уһуйаан эйгэтигэр – үлэлэһиэххэ наада, оҕо саҥатын сайыннарарга үчүгэй тылбаас эмиэ улахан суолталаах диэн этии киллэрбит, хамсааһыны саҕалаабыт биһиги маҕыстырааммыт, Төҥүлү “Олимпионик” уһуйаан иитээччитэ Марфа Сидорова буолар”, — диэн үнүстүүт саха тылын истилиистикэтин уонна сахалыы-нууччалыы тылбаас хаапыдыратын дассыана, бэлэлиэгийэ билимин хандьыдаата Акулина Васильева иһитиннэрдэ.
Төҥүлү уһуйаана “Родной язык как основа передачи базовых ценностей” диэн бэдэрээлинэй үөрэх бырагырааматын сүрүн чааһын төрөөбүт тылынан үөрэтэргэ анаан, онно киирбит нууччалыы айымньылары сахалыы тылбаастыыр бырайыагын чэрчитинэн, үүнэр көлүөнэҕэ төрөөбүт тылы чөл туруктаах тиэрдэр, оҕо сахалыы сайаҕас саҥалаах буоларыгар төрүт уурар соруктаах үлэлиир.
Хаартыска: Марфа Сидорова
Онон дуогабар олоххо киирдэҕинэ, саха тылын туһугар үлэлии сылдьар үөрэх кыһалара бэйэ-бэйэлэригэр өйөбүл буоларга сөбүлэҥ түһэристилэр. Марфа Сидорова эппитинэн, “Олимпионник” уһуйааҥҥа 130-ча кырачаан иитиллэр-үөрэнэр. Оҕону төрөөбүт тылга уһуйууга анаммыт тылбаас бырайыагын ааптарынан сүрүннүүр иитээччи Саргылаана Шестакова буолар.
