Бэҕэһээ Ньурба улууһун баһылыгын тыа хаһаайыстыбатыгар солбуйааччыта Леонид Ушканов халаан уутун хамыыһыйатын оробуочай мунньаҕын салайан ыытта. Дьөҥкүүдэ эбэтигэр Аканаҕа буор быһыты бөҕөргөтүү туһунан боппуруос көрүлүннэ.
Акана нэһилиэгин баһылыга Ефрем Семенов уонна Саха Өрөспүүбүлүкэтин Мелиорация управлениетын Ньурбатааҕы филиалын салайааччыта Алексей Васильев информациялара истилиннэ.
Сүбэ мунньах түмүгүнэн Дьөҥкүүдэ эбэҕэ баар буор быһыты бөҕөргөтөргө чугастааҕы нэһилиэктэр олохтоохторо уонна тэрилтэлэр үлэһиттэрэ субуотунньук ыытарга быһаарыллыбыта.
Бүгүн тэрилтэлэр уонна улуус дьаһалтатын үлэһиттэрэ – эр дьон Дьөҥкүүдэҕэ куулга буору кутан дьаарыстаан, быһыты бөҕөргөтүүгэ субуотунньуктуу сылдьаллар, суруйда Геннадий Антонов, gazetanyurba.
