Ил Дархан Айсен Николаев алтынньы 22 күнүгэр, Нерюнгрига сырыытын кэмигэр, киин балыыһа саҥа мэдиссиинискэй тэриллэринэн хааччыллыытын билистэ.
Быйыл балыыһа тымыр салаата МРТ, саҥа ангиографическай комплексынан хааччыллыбыт. Маны таһынан РФ бырабыыталыстыбатын саппаас пуондатын үбүнэн коронавирус инфекциятын утары рентген, ИВЛ аппараттара, кислородунан хааччыйыы киин ситимэ о.д.а. наадалаах тэриллэр ылыллыбыттар. Билигин саҥа тэриллэр туруохтаах сирдэригэр өрөмүөн үлэтэ барар.
Айсен Николаев МРТ туруохтаах хоһун, тымыр салаатыгар эпэрээссийэлиир хос өрөмүөнүн көрдө.
Ил Дархан былааннаммыт үлэлэри хаачыстыбалаахтык, кэмигэр бүтэрэн, сыл бүтүүтэ олохтоохтору саҥа тэриллэринэн көрөн саҕалыыры эттэ.
