Ааспыт нэдиэлэҕэ Нам улууһун бэтэрээннэрин Сэбиэтэ тэрийиитинэн Саха сирин бөдөҥ политическай уонна государственнай деятелэ Илья Егорович Винокуров төрөөбүтэ 120 сылын чэрчитинэн «Биһиги буолабыт — холкуостаах хоодуоттар» диэн бэтэрээннэргэ аналлаах итии-истиҥ көрсүһүү буолан ааста.
Тэрээһиҥҥэ Никольскайдааҕы сир музейын үлэһиттэрэ ааспыт кэмнээҕи күргүөмнээх үлэни-хамнаһы санатар тэриллэринэн быыстапка оҥордулар.
Кэпсэтиигэ И.Е. Винокуров биир дойдулааҕа, Ылдьаа Арыытыгар төрөөбүт Герасим Марков үлэлээн ааспыт кэмнэрин иһирэхтик ахтан ааста. «Илья Егорович доруобуйа харыстабылын наркомунан үлэлии олорон сэллиги утары үлэни ыытан, сэллик диспансерын тэрийэн, мин бу кэлэн турабын», — диэн киниэхэ махтанарын биллэрдэ. Илья Егорович чугас дьонун-сэргэтин, кинини бастаан көрбүтүн туһунан кэпсээтэ. Хомустаахтан СӨ норуотун хаһаайыстыбатын туйгуна Дмитрий Аргунов хайдах элбэх үүтү ыабытын, хаһан производстваҕа тахсыбытын туһунан билиһиннэрдэ уонна доҕотторугар, атастарыгар анаан «Агитатор Даарыйа» диэн ырыанан эҕэрдэлээтэ.
Нэһилиэк бэтэрээннэрин Сэбиэтин бэрэссэдээтэлэ С.Д. Кобякова оччотооҕу кэмҥэ үлэлээн ааспыт дьону, күргүөмүнэн таһаарыылаахтык ыытыллыбыт үлэни аҕынна. Биир да өрөбүлэ, тохтобула суох үлэлээбит бэтэрээннэр уруккуларын, эдэр эрчимнээх кэмнэрин долгуйа ахтан, санаһан, үөрэ-көтө сэһэргэһэн, санааларын үллэстэн олуһун диэн үөрдүлэр.
