Бэҕэһээ, кулун тутар 22 күнүгэр, Ragnarok көмпүүтэр кулуубугар «Муус устар» ыччат бэстибээлин чэрчитинэн, Dota2 оонньууга чемпионат финала буолан ааста. Чемпионат сүрүн бирииһэ — 100 тыһыынча солкуобай. Кыайыыны minkiers хамаанда кыайда.
Dota2 оонньуу чемпионата бэстибээл «Играй и создавай»хайысхатынан тэрилиннэ. Кыайыылаахтар хамаандаларыгар Михаил Данилов, Александр Осипов, Василий Моеков, Тимур Титов уонна Сергей Федулов кытыннылар.
«Мин 28 саастаахпын, киберспорт эйгэтигэр кырдьаҕаспын. Эдэрдэргэ бу суол-иис саҕаланыыта буолар, бу оонньууга кыайаннар салгыы өссө элбэҕи ситиһиэхтэрин баҕарыахтара. Тапталлаах дьарыгын дохуот аҕалара киһини олус үөрдэр диэн,» — диэн санаатын үллэһиннэ.
Чемпионат сүүмэрдиир түһүмэҕэр Саха сирин оройуоннарыттан уонна Дьокуускай куораттан 60- ча хамаанда кытынна, финалга түөрт хамаанда тахсыбыта: Анаабыр оройуонуттан ATS, уонна Дьокуускайтан NoMarat, minkiers, ОСКОЗ хамаандалар.