Үрүҥ эһэ норуоттар ардыларынааҕы күнэ олунньу 27 күнүгэр, бэҕэһээ, бэлиэтэннэ. Колымана уонна Ломоносов бу сыл тохсунньутугар «Орто Дойду» зоопаркаҕа эмиэ оҕолоннулар. ЯСИА кинилэр улахан оҕолоро уонна атын үрүҥ эһэлэр ханна олохсуйбуттарын туһунан кэпсээтэ.
Сэттэ саастаах Хаарчаана, Колымана уонна Ломоносов кыыстара, билигин Санкт-Петербург зоопаркатыгар баар. Россия хоту киин куоратын олохтоохторо уонна ыалдьыттара кинини олус сөбүлүүллэр. Хаарчаананы 2017 сыллаахха онно көһөрбүттэрэ.
Кини быраата Алмаас, 2019 сыл ахсынньытыгар күн сирин көрбүтэ, билигин Хабаровскайга «Приамурскай» зоосадка олорор. Кини Саха сириттэн барарыгар икки сааһын туолаары сылдьара. Билигин түөрт саастаах үрүҥ эһэ бассейнҥа сөтүөлүүр, сөбүлүүр оонньуурдардаах. Зоосадка кэлбит дьон болҕомтотун ыларын сөбүлүүр.
Бэлиэтээн эттэххэ, 2020 сыл муус устар 3 күнүгэр Колымана «Орто Дойду» зоопаркаҕа иккис оҕотун Алмааһы төрөппүтэ. Ити түгэни киэҥ араҥаҕа тахсыбатаҕа — зоопарка, атын уопсастыбаннай тэрилтэлэр курдук, дьон көрүүтүгэр сабыылааҕа.
Саха сириттэн атын региоҥҥа көспүт үрүҥ эһэлэр эмиэ бааллар.
Умка-Аяна, 2019 сыллаахха Орто Халымаҕа быыһаммыт, билигин «Лимпопо» нижегородской зоопаркаҕа олорор. 2021 сыллаахха киниэхэ ханыытын булбуттара.
Томпа, Дьабарыкы-Хайа бөһүөлэгин таһыгар 2021 сыллаахха булуллубут үрүҥ эһэ, билигин Москва зоопаркатыгар баар. Исписэлиистэр этэллэринэн, аһылыга үчүгэй, эттэн саҕалаан оҕуруот аһыгар диэри барытын сиир. Кини ыаллаах, Диксон диэн ааттаах, 2022 сыллаахха Красноярскай кыраайга булуллубута.
«Орто Дойду» зоопаркатыгар бэлиэ күҥҥэ анаан, бу сыл тохсунньутугар күн сирин көрбүт үрүҥ эһэ оҕолорун көрдөрдүлэр.
