Улуус баһылыга Николай Старостин ыччаттар көҕүлээһиннэрин өйөөн, икки сыллааҕыта «Баһылык этэрээтэ» диэн уопсастыбаннай тэрилтэни тэрийэргэ дьаһал таһаарбыта.
«Баһылык этэрээтин» тэрийии бырайыагын ааптардарынан уонна салайаччыларынан Аллараа Бэстээхтээҕи Транспортнай техникум директоры иитэр үлэҕэ солбуйааччы Владислав Хабаров уонна техникум анал дьиссипиилиинэлэргэ преподавателэ Альбина Захарова буолаллар.
Ыччаты, оскуола оҕолорун патриотическай тыыҥҥа иитии, волонтерскай хамсааһыны сайыннарыы, аҕам саастаах дьоҥҥо дьиэлэригэр ис-тас үлэҕэ субуотунньуктары тэрийэр сыаллаах тэриллибит Этэрээт билигин үлэтин үгэнэ.
Өрөспүүбүлүкэҕэ Тупсаран оҥоруу сылынан быйыл сайын «Баһылык этэрээтэ» улууспут нэһилиэктэригэр тутар этэрээттэри тэрийэн үлэлэтэр соруктаах. Билигин онно ыччаттары сүүмэрдээһин бара турар. Тутар этэрээттэр нэһилиэктэргэ тутууга уонна нэһилиэктэри тупсаран оҥорууга ылсан үлэлиэхтэрэ.
‒ Бүгүҥҥү күҥҥэ этэрээппитигэр Транспортнай техникум уонна быйылгыттан Дьокуускайдааҕы тыа хаһаайыстыбатын техникумун филиала буолбут Төҥүлүтээҕи профессиональнай лицей устудьуоннара, барыта 350 ыччат киирэр, ‒ диир Владислав Хабаров. ‒ Этэрээт хамандыырынан Төхтүрдээҕи култуура киинин исписэлииһэ Айаан Верховцев, үлэтин сүрүннээччинэн улуус дьаһалтатын дьиэ кэргэн политикатыгар уонна ыччаты кытары үлэҕэ управлениетын испэсэлииһэ Зоя Сергучева буолаллар. Улууспут нэһилиэктэригэр ‒ Мэҥэҕэ, Дойдуга, Нөөрүктээйигэ, Хорообукка, Мөҥүрүөҥҥэ, Төҥүлүгэ, Алтаҥҥа, Дьаҥхаадыга, Томторго, Ороссолуодаҕа сылдьан кырдьаҕас дьоҥҥо көмөлөһөн субуотунньуктары, нэһилиэк ыччаттарын кытары спорт көрүҥнэригэр табаарыстыы күрэхтэһиилэри тэрийдибит. Нэһилиэктэргэ тиийэн олохтоох музейдарынан, историческай миэстэлэринэн экскурсиялыыбыт, устудьуоннар оскуолаларга патриотическай ис хоһоонноох кылаас чаастарын ыыталлар, — диэн салгыы кэпсиир кини.
Ыччаттар ыам ыйын 21 күнүгэр Төҥүлү бөһүөлэгэр Партизаҥҥа аналлаах пааматынньыкка, балыыһа таһыгар субуотунньуктаатылар.
