Евгений Юрьевич ССРС Суруйааччыларын сойууһун чилиэнэ этэ, билигин Санкт-Петербург уонна Россия Суруйааччыларын сойууһун чилиэнинэн буолар. «Звезда» литературнай сурунаал прозаҕа отделын сэбиэдиссэйинэн үлэлиир. Идэтинэн геолог, техническэй наука кандидата, элбэх романнар, сэһэннэр, хоһооннор уонна кэпсээннэр ааптардара. Сорох айымньылара ньиэмэс, румын, вьетнам уонна кытай тылларыгар тылбаастаммыт. Кини Николай Гоголь аатынан бириэмийэ лауреата.
Евгений Юрьевич саха суруйааччыларын өрдөөҕүттэн доҕордоро. Бэйэтин көҕүлээһининэн буор-босхо «Алампа» икки саамай уустук философскай поэмаларын: Архангельскай сыылкатыгар сылдьан суруйбут «Аҕабар сурук» уонна «Ытык хайалар кэпсэтиилэрэ» диэн айымньыларын тылбаастаабыта. «Аҕабар сурук» поэманы 2012 с. «Звезда» сурунаалга бэчээттэппитэ. Баллыр тылбааһын Максим Аммосов аатынан ХИФУ студеннара уонна преподавателлэрэ оҥорбуттара. Ити тылбаастар литературоведтар үрдүк сыанабылларын ылбыттара. Онон кини биһиги классикпыт А.И. Софронов айымньытын Россия уонна аан дойду ааҕааччыларыгар чугаһатар.
Егор Неймохов «Алампа» романын (40-ча авторскай лиистээх) тылбаастааһына – Евгений Каминскай кэлиҥҥи кэмҥэ улахан үлэтинэн буолар. Бу кинигэ нуучча ааҕааччытын саха норуотун историятын, эпоһын уонна культуратын кытта билиһиннэрэр. Ону таһынан, кини саха норуотун биир саамай биллэр уонна талааннаах бэрэстэбиитэлин айар суолун уонна трагическай төлкөтүн туһунан кэпсиир. Уһун сылларга түрмэҕэ уонна сыылкаҕа сылдьан да баран, бэйэтин идеалларын таҥнарбатах, өстүйбэтэх, дьоҥҥо тапталын уонна итэҕэлин илдьэ сылдьыбыт.
Кинигэни таптааччылар уонна Егор Неймохов биир дойдулаахтарын кытта көрсүһүү истиҥник ааста. Евгений Юрьевиһы кытта мелодист, быраас идэлээх Виталий Тимофеевич Андросов уонна Е. Неймохов огдообото Мария Петровна кэлбиттэрэ. Улахан суруйааччы ити күн сарсыарда Москубаттан көтөн кэлээт, массыынаҕа олорбут да Мэҥэ Алдаҥҥа айаннаабыт.
Тэрээһин кыргыттар ансаамбыллара саха үҥкүүтүнэн, хомусчут кыргыттар эҕэрдэлэринэн аһылынна. Уолаттар «Алампа» хоһооннорун бастаан сахалыы, онтон Евгений Юрьевич тылбааһынан нууччалыы аахтылар.
Көрсүһүүнү Мэҥэ Алдан оскуолатын директора Александр Николаев салайан ыытта. Евгений Каминскай кылгастык тыл эттэ, «цивилизациялар үөскүүллэр уонна эстэллэр, оттон тыл уонна кинигэлэр хаалаллар», — диэн бэлиэтээтэ. Элбэх ыйытыыларга хоруйдаата.
Оскуола 10 кылааһын үөрэнээччилэрэ Попов Александр уонна Халыева Ольга ыалдьыты эҕэрдэлээтилэр. Көрсүһүү кыттыылаахтара ыалдьыкка араас кинигэлэри уонна эҕэрдэ аадырыстары туттардылар.
