21 От ыйа 21.07
  • 28°
  • $ 88,02
  • 96,04

Матта агрогрантиһа «МТЗ-82» тыраахтары, от урулуоннууру уонна охсору ылынна

Читайте нас на
Яндекс Новости
ЯДВ

Мэҥэ Хаҥалас улууһуттан 2021 сылга «Агростартап» гранын үс киһи ылбыта. Олортон иккитэ Мөҥүрүөн нэһилиэгэр олороллор. Барыта 13 киһи грант куонкуруһугар улуустан кыттыбыта биллэр. Оройуоҥҥа Александр Протопопов балачча биллэр-көстөр хаһаайыстыбанньык, суруйда «Эркээйи» хаһыат.

Былырыын Александр Протопопов «Агростартап» грант куонкуруһугар ситиһиилээхтик кыттан, 3 мөлүйүөн солкуобай үбү ылбыта. Онтун хаһаайыстыбатын материальнай-техническэй базатын бөҕөргөтүүгэ толору туһанна.

Грант куонкуруһун түмүгэ күһүн хойутаан биллибитэ, ‒ диир кини. ‒ Ол онон «МТЗ-82» тыраахтары, от урулуоннууру уонна Италия оҥоһуута оруотар от охсору ылбытым. Грант усулуобуйатынан бааһынай хаһаайыстыба буолбутум.

Аграрий иһитиннэрбитинэн, кыттыгастарын кытта алта үөр сылгылаахтар. Сылгыларын базата бөһүөлэк аннынааҕы 40-ча гектардаах Улахан Сыгынньахха баар. Манна хаста да улахан күүлэйдэр ыытыллыбыт сирдэрэ. Өссө биир сирдэрэ Маттаттан 10 килэмиэтир тэйиччи. Итиннэ, Атахааҥҥа, ходуһа үс гыммыттан биирин ‒ 64 гааны киниэхэ тыыран биэрбиттэригэр оттууллар. Улахан Сыгынньахха оҕолуун-уруулууун саба түһэн отторун оттоон кэлбит буоллахтарына, быйылгыттан саҥа тиэхиньикэни туһанан түргэнник, үчүгэй хаачыстыбалаахтык оттуур кыахтаммыттар. Атахаантан отторун кыһын таһаллар.

Нэһилиэгин иһиттэн эбии 5 биэни атыыласпыт. Хотонугар 10-тан тахса сүөһүнү кыстыгар туруорар. Түөрт ыанар ынахтаах. Биир-икки ыйынан эбиллиилэр баар буолалларыгар эрэнэр. Сылын аайы биэлэри саастарыттан көрөн сыыйаллар. Хаһаайыстыбатын сайыннаран, инникитин үлэ миэстэлэрин таһааран, эдэрдэри сылгыга сыһыаран үлэлэтэр баҕалаах. «Былаан киэҥ», — диир.

Александр Протопопов идэтинэн зоотехник.

Граҥҥа кыттарыгар уонна ситиһиилэнэригэр баһылык Иннокентий Андросов, тыа хаһаайыстыбатын исписэлииһэ Иван Захаров уонна улуустааҕы тыа хаһаайыстыбатын управлениетыгар граннарга кыттыыны сүрүннүүр исписэлиис Нюргуяна Семенова кыһамньылаах үлэлэрин түмүктэрэ көстөр диэн махтана бэлиэтээтэ.

Следите за самым важным и интересным в Telegram-канале и WhatsApp-группе ЯСИА