Соторутааҕыта социальнай ситимнэринэн улуус олохтооҕо «түүлээх уллуҥахтар» тыһаҕаһын уоран, өлөрөн, этин бүтүннүү тиэйэн барбыттарын туһунан айманан устубут видеота тарҕаммыта.
ИДьМ Саха сиринээҕи салалтатын пресс-сулууспата буруйдаахтар кимнээх буолаллара быһаарылынна диэн иһитиннэрдэ.
Тыһаҕаһын сүтэрбит Мэҥэ Хаҥалас улууһун олохтооҕо Ис дьыала министиэристибэтин салалтатыгар үҥсүү түһэрбит. Бу иннинэ сүтүктээх киһи дэриэбинэ чугаһынан сүөһүлэрин көрдүү сылдьан, сыбаалкаттан өлбүт сүөһү туйахтаах-тириитин булбут. Сыбаалкаҕа сүөһү төбөтө, туйаҕа уонна тириитэ сытар эбит – эмсэҕэлээбит киһи сүөһүтүн кулгааҕын бэлиэтинэн киниэнэ буоларын быһаарбыт.
Хоромньу уопсай суумата 108 тыһыынча солкуобайга тэҥнэспит.
Суһал көрдөөһүн үлэлэрин түмүгэр холуобунай ирдэбил үлэһиттэрэ 37-тэн 54-гэр диэри саастаах Майа нэһилиэгин үс олохтооҕо уорбутун быһаарбыттар. Эр дьонтон биирдэстэрин сүөһүлэригэр холбоспут атын киһи кунанын үс буолан өлөрбүттэр. Этин, иһин үллэстэн баран, хаалбытын сыбаалкаҕа илдьэн бырахпыттар.
Бу чахчынан РФ Холуобунай кодексатын 158-с ыст. 2-с чааһынан, ол эбэтэр, уоруу бэлиэтэ баарынан, холуобунай дьыала тэрилиннэ.
