2020 сылга Ленскэй оройуонун Батамай сэлиэнньэтигэр үүтү уонна сыыры оҥорор сыаҕы тутуу былааннанар. Бу туһунан улуус дьаһалтатын пресс-сулууспата иһитиннэрэр диэн НВК «Саха» кэпсиир.
Олунньу 3 күнүгэр Ленскэй оройуонун баһылыга Жумарт Абильманов Батамай сэлиэнньэтин олохтоохторугар отчуотун кэмигэр улууска соҕотох үүт аһылыгы оҥорор «Батамай» хаһаайыстыба сайдыытын былаанын туһунан кэпсээтэ.
2019 сылга хаһаайыстыбаны өйөөһүҥҥэ 31 мөлүйүөн солкуобай үп көрүллэн, хотон өрөмүөнэ, үүт ситимин туруоруу, саҥа оборудованиены уонна тиэхиникэни атыылаһыы оҥоһулунна.
«2020 сылга улахан былааннар кэтэһэллэр. Ол курдук, үүтү уонна сыыры оҥорор сыаҕы тутуу. Маны таһынан өрөспүүбүлүкэ тыа хаһаайыстыбатын министиэристибэтин иитинэн «Батамай» хаһаайыстыбатыгар 100 төбө сүөһүтэ кэлиэхтээх», — диэн баһылык эттэ.
2020 сыл тохсунньу 1 күнүттэн хаһаайыстыбаҕа ынаҕы көрөөччүлэр уонна ыанньыксыттар хамнастара үрдээбитэ бэлиэтэнэр. Сотору кэминэн хачыгаар хамнаһа эбиллэрэ күүтүллэр.
