РФ сокуонунан, 1,5-тэн 3-гэр диэри саастаах оҕону көрөн декретнай уоппускаҕа олорор дьахтар бэйэтин регионугар баар Дьарыктаах буолуу киинигэр, эбэтэр партнерскай автоскуолаҕа быһаччы баран, массыына ыыта үөрэнэргэ сөбүлэһиини түһэрсэр бырааптаах диэн баар. Бу быраабынан биһиги өрөспүүбүлүкэбитигэр туһаныахха сөбүн суоҕун билээри СИА Дьокуускайдааҕы Дьарыктаах буолуу кииниттэн чуолкайдаата.
“Мин оҕолонорум саҕана ийэлэр бассаап группаларыгар “босхо суоппардыыр быраабы ылыахха сөп” диэн сонун биир кэм тарҕана сылдьыбыта. Бары интэриэһигээбиппит эрээри, ким даҕаны баран билсибитин да, үөрэммитин да истибэтэҕим”, — диэн кэпсиир эдэр ийэ Наталья Румянцева.
Маныаха, Дьарыктаах буолуу киин пресс-сулууспата, оҕолорун көрөн олорор ийэлэр эбии үөрэххэ үөрэниэхтэрин син диэн чопчулаата. Ол эрээри, эбии үөрэхтээһин буолан, дьахтар эрдэ массыына ыытар бырааба суох эбит буоллаҕына, саҥаттан үөрэппэттэр.
“2019 сылтан Арассыыйа үрдүнэн “Демография” нацбырайыак үлэлиир. Бу бырайыагынан декретнай уоппускаҕа олорор дьахталлар, үлэтэ суох 7-гэр диэри саастаах оҕолоох ийэлэр, үлэ булалларын ыарырҕатааччылар, биэнсийэҕэ тахсаары сылдьааччылар, 70-гар диэри саастаах аҕам дьон эбии идэҕэ босхо үөрэниэхтэрин сөп. Былырыын биһиги өрөспүүбүлүкэбитигэр 2473 киһи бу бырайыак чэрчитинэн үөрэммитэ, мантан 87,2% ол кэннэ үлэ булбута. Быйыл 888 киһини үөрэхтиир былааннаахпыт. Элбэх киһи аччыгый сиэстирэ үөрэҕин баһылыыр, эбэтэр сыбааркалыыр идэҕэ үөрэнэллэр. Ийэлэр дьиэлэриттэн олорон кэтэхтэн үөрэнэллэрин ордороллор”, -диэн Дьарыктаах буолуу киинигэр анал үөрэхтээһин үлэтин тэрийэр отделын салайааччыта Мария Бурцева бэлиэтээтэ.
Мария Бурцева эппитинэн, суоппардыыр быраабы ылыан баҕалаах киһи, үлэлиэн сөптөөх тэрилтэтин булан баран дуогабар түһэрсиэн син. Оччоҕо тэрилтэ кини үөрэҕин төлүүр, онтон бу киһи бүтэрэн баран онно үлэҕэ киирэр. “Демография” нацбырайыагынан, талбыт хайысхаҕынан үрдэтинии ааһаҕын, онон манна эрдэ B категория бырааба суох киһини С-ка эбэтэр D-га үөрэппэттэр. Өскөтүн эрдэттэн В категориялаах буоллаххына, атын категорияҕа босхо үөрэтэллэр.
