«Хас да сыл анараа өттүгэр ылыллыбыт быһаарыылар, сүрүннээн, туоллулар диэн сыаналыыбын. Өрөспүүбүлүкэҕэ бу хайысхаҕа көрдөрүүтэ куһаҕана суох, араас саастаах дьон физическай культуранан уонна спордунан дьарыктаныылара эбиллэ турар. Россиятааҕы, норуоттар ардыларынааҕы бөдөҥ күрэхтэһиилэр биһиэхэ ыытылыннылар. Ону кытта кэм саҥа ирдэбиллэри уонна усуолуобуйаны ирдиир. Адаптивнай физкультура, адаптивнай спорт сайдыытыгар өссө болҕомто ууруллуон наада. Анал байыаннай дьайыы кыттыылаахтарыгар реабилитация, социализация боппуруостара физическай культура уонна спорт нөҥүө бэриллэрэ бастакынан тутуллуохтаах», — диэтэ Айсен Николаев.
Баһылык эппитинэн, киһи доруобуйатыттан дойду сайдыыта саҕаланар, онон физическай культураҕа уонна спортка, бастатан туран, маассабай спортка улахан болҕомто ууруллуохтаах. Сүрүн сыал – 2030 сылга диэри утумнаахтык физическай культуранан уонна спордунан дьарыктанар дьону нэһилиэнньэ уопсай ахсааныттан 70% тириэрдии. Билигин ити көрдөрүү 60,2 % тэҥ.
Хаартыска: Андрей Сорокин, ЯСИА
Спорт миниистирэ Леонид Спиридонов эппитинэн, дьон физкультуранан уонна спордунан дьарыктаныылара, бу процесска улуус баһылыга бэйэтинэн кыттар сиригэр, элбэх.
Сылын аайы ортотунан 600 регионнааҕы официальнай спорт тэрээһинэ ыытыллар. Спорт 110 көрүҥэ баар, онно 73 аккредитациялаах спорт федерацията үлэлиир. Федерациялар 2023 сылтан регион бюджетыттан субсидия ылаллар. Икки сылга 56 федерация уопсайа 60 мөл солк өйөбүл ылла. 36 муниципальнай оройуоҥҥа уонна куорат уокуругар ГТО 42 киинэ арылынна.
Ил Дархан эппиэттээх министиэристибэлэргэ уонна биэдэмистибэлэргэ оҕо-юношескай спордун сайыннарыыга ылсалларыгар сорудахтаата, маны сэргэ уһун үйэлэнии бырагырааматын олоххо киллэриини күүһүрдэргэ, оскуола оҕолоругар ГТО туттарыытын көхтөөхтүк тэрийэллэригэр, чөл олох тэрээһиннэрин тохтоло суох ыыталларыгар этилиннэ.
Айсен Николаев бырабыыталыстыбаҕа туһаайан спорт эбийиэктэригэр дьон сылдьыытын элбэтиигэ муус устарга этии киллэрэллэригэр эттэ, олохтоох нэһилиэнньэҕэ үөрэх тэрилтэлэригэр баар спорт инфраструктуратын биир кэлим туһаныы боппуруоһун көрөллөрүгэр, модульнай спорт саалаларын нэһилиэнньэлээх пууннарга тутууну сорудахтаата. Маны сэргэ, сайыҥҥы спорт лааҕырдарын уонна «Здоровый наслег» бырайыак сөпкө үлэлиэхтээҕин ыйда.
Дойду президенэ Владимир Путин 2024 сыл сэтинньи 28 күнүнээҕи ыйааҕыгар олоҕуран, дьон физкультуранан уонна спордунан дьарыктаналларыгар усулуобуйаны тэрийии таһыма үрдүөхтээх.
