Мобильнай биригээдэлэр быйылгыттан 40 км тэйиччи оттуур буоллулар да хамнас аахсыахтара. Урут отчуттар 60 км ыраах оттуур эбит буоллахтарына хамнас аахсаллара. Бу туһунан Ил Дархан Айсен Николаев социальнай ситимнэринэн быһа тахсыытын кэмигэр иһитиннэрдэ диэн, СИА суруйар.
«Быйыл от бэлэмнээһинигэр уустук сыл. Тыа сирин олохтоохторо күнүһү-түүнү аахсыбакка от бэлэмнээһинигэр сылдьаллар. Киин, өрүс уҥуор баһылыктарын этиилэрин ылынан от бэлэмнээһинин хампаанньатыгар кэккэ дьаһаллары ыллыбыт. Ол курдук, быйылгыттан мобильнай биригээдэлэр 40 км тэйиччи сиргэ оттуур буоллулар да хамнас аахсыахтара. Урут ити кээмэй 60 килэмиэтиринэн быһыллара», — диэтэ Ил Дархан.
Итини таһынан, Ил Дархан мобильнай биригээдэлэри уматыгынан хааччыйары сорудахтаата. Бырабыыталыстыбаҕа туһаайан Ил Дархан сүөһү-сылгы кыстыыр отун бэлэмнээһиҥҥэ бары өттүнэн көмөлөһөрү соруйда.
«Быйыл тыа хаһаайыстыбатыгар сүөһү-сылгы ахсаана аҕыйаабатыгар сүрүн болҕомтобутун ууруохтаахпыт», — диэтэ Айсен Николаев.
