Айсен Николаев Дмитрий Садовниковы куорат баһылыгын дуоһунаһыгар талбыттарын туһунан кэпсээтэ. Куорат Дууматын дьокутааттара кинини өрөспүүбүлүкэ олохтоох салайыныы туһунан сокуонунан көрүллүбүт саҥа бэрээдэгинэн таллылар.
«Дмитрий Дмитриевиһы балайда уһун кэм устата билэбин. Кини куорат управатыгар үлэлээһинтэн өрөспүүбүлүкэ бырабыыталыстыбатын бэрэссэдээтэлин бастакы солбуйааччыга диэри суолу ааста, Дьокуускайы үчүгэйдик билэр уонна куорат хаһаайыстыбата хайдах үлэлиирин өйдүүр. Бу эппиэтинэстээх уонна ирдэбиллээх салайааччы, тыла дьыалатыттан араарыллыбат», — диэн Саха сирин баһылыга «Макс»-ка суруйда.
Айсен Николаев бэлиэтээбитинэн, Садовниковка куорат сулууспаларын чуолкай үлэлэрин хааччыйыахтаах уонна маастар-былааны дьон олоҕун эйгэтин уонна хаачыстыбатын уларытар чопчу бырайыактарынан олоххо киллэриэхтээх. Дьокуускай 400 сыллаах үбүлүөйүгэр аныгы, тупсаҕай оҥоһуулаах уонна дьоҥҥо табыгастаах куорат буолан тахсыахтаах.
«Бу үлэ сүрүн киритиэрийэ — куорат олохтоохторун олохторо-дьаһахтара чопчу үчүгэй өттүгэр уларыйыылара», — диэн Айсен Николаев тоһоҕолоон бэлиэтээтэ.
Кини ону тэҥэ Евгений Григорьевка Дьокуускай баһылыгынан үлэлээбитин иһин махталын биллэрдэ: «Уустук сылларга кини куорат сайдыытыгар элбэҕи оҥордо, маастар-былаан бэлэмнэниигэ көхтөөхтүк кытынна, анал байыаннай дьайыы кыттыылаахтарын уонна кинилэр дьиэ кэргэттэрин өйөөһүҥҥэ улахан болҕомтону уурда. Кини мунньуммут салайар уопутун Саха сирин туһугар салгыы үлэтигэр туһаныа диэн эрэнэбин».
Баһылык этэринэн, олохтоохтор Дьокуускай хайдах уларыйан эрэрин көрөллөр, ол гынан баран быһаарыллыахтаах боппуруостар билигин да элбэхтэр. Өрөспүүбүлүкэ бырабыыталыстыбата уонна куорат хамаандата биир сомоҕо курдук үлэлиэхтээхтэр.
«Дмитрий Садовников итэҕэли толоруоҕа уонна Дьокуускайы сайыннарыыга уонна олохтоохторун олохторун тупсарыыга бары күүһүн-уоҕун ууруоҕа диэн эрэнэбин», — диэн Айсен Николаев түмүктээтэ.
