Саха сылгыта ханна да суох ураты сылгы. Биһиги өбүгэлэрбит тыйыс хотугу сиргэ сөп түбэһэр саҥа боруоданы үөскэтэн таһаарбыттара. Сибиири бастакы чинчийээччилэр тымныыны тулуйар, талымастаабат саха аттарын туһунан кэпсииллэрэ. Биһиги аттарбыт Арктиканы баһылааччылар сүрүн көмөлөһөөччүлэрэ этилэр.
Сахаҕа сылгы ытык суолталаах. Олоҕун устата наар киһи аттыгар сылдьара, биһиги эпоспытыгар, итэҕэлбитигэр да көстөр. Сылгыны киһилии өйдөөх-санаалаах, тыллаах-өстөөх гына ойуулууллара, бэриниилээх, тулуурдаах уонна да атын сыаналаах хаачыстыбалара бэлиэтэнэрэ. Кинилэри миинэр миҥэ оҥостон, уйаара-кэйээр суох Саха сирин баһылаабыттара. Ат мииммит дьон биһиги бырааһынньыктарбыт сүрүн киэргэтээччилэринэн буолаллар.
Сылгыһыттар үтүө суобастаах үлэлэрин түмүгүнэн, биһиги өрөспүүбүлүкэбит саамай сөпкө Арассыыйа Федерациятыгар сылгы иитиитин биир сүрүннүүр эрэгийиэнинэн буолар.
Күн бүгүн бары хаһаайыстыбаларга 172 тыһыынчаттан тахса сылгы баар. Кэскиллээх салаа сүрүн соругунан саха сылгытын боруодатын уонна тииптэрин тупсаран иһии буолар. Билигин 25 бөдөҥ хаһаайыстыба племенной үлэнэн дьарыктанар, олортон 16-та дойду племенной регистрыгар регистрациялааҕын туһунан туоһу суруктаах.
Эти оҥорууга эмиэ үчүгэй көрдөрүүлээхпит. Сылгы этин валовай оҥоһуута 2024 сылга 14,3 тыһыынча туоннаҕа диэри улаатта, бу эрэгийиэн аһынан-үөлүнэн хааччыллыытыгар улахан суолталаах. Өрөспүүбүлүкэ тыатын хаһаайыстыбатын министиэристибэтэ сылгы үөрдээн сайыннарыыга улахан болҕомтотун уурар. Ол курдук быйыл салааны сайыннарыыга 661 мөлүйүөн көрүллүбүт. Бу 2024 сыллааҕар 107 мөлүйүөнтэн тахса солкуобайынан элбэх.
Быйыл Сылгыһыт күнүн биһиги Мэҥэ Хаҥалас улууһун Хара нэһилиэгэр бэлиэтиэхпит. Тэрээһин Аҕа дойду Улуу сэриитин Кыайыы 80 сылыгар, Уһук Илиҥҥи федеральнай уокурук тэриллибитэ 25 сылыгар уонна Социалистическай Үлэ Геройа, Саха сирин аатырбыт сылгыһыта Афанасий Егорович Степанов төрөөбүтэ 105 сылыгар ананар.
Бу күн сүрүн сабыытыйатынан “Сылгыһыт күрэҕэ” өрөспүүбүлүкэтээҕи куонкурус буолуоҕа, манна сылгыһыттар дьокуускайдааҕы, өлүөнэтээҕи, мэгэдьэк боруода бастыҥ аттарын көрдөрүөхтэрэ. Күрэхтэһии кыайыылаахтара сыаналаах бириистэринэн наҕараадаланыахтара.
Ытыктабыллаах сылгыһыттар!
Саха дьонугар бу бырааһынньык ураты ис хоһоонноох. Ата суох саха табыллыбат. Эһиги үтүө суобастаах үлэҕит уонна өрөспүүбүлүкэ социальнай-экэнэмиичэскэй сайдыытыгар угар улахан кылааккыт иһин махтанабын! Эһиэхэ уонна эһиги дьиэ кэргэннэргитигэр чэгиэн доруобуйаны, байылыат олоҕу уонна Саха сирин сайда турарын туһугар ситиһиилэри баҕарабын!
Саха Өрөспүүбүлүкэтин Ил Дархана А.С. Николаев
