АО «Теплоэнергосервис» (ПАО «Якутскэнерго» хос уопсастыбата, «РусГидро» бөлөххө киирэр) сайыҥҥы кэмҥэ ититии төлөбүрүн ааҕыы бэрээдэгин быһаарда. Хампаанньа бу аахсыйалар алҕас буолбатахтарын уонна сайын дьиҥнээхтик туттуллубут сылааһы төлөөһүн буолбатын тоһоҕолоон бэлиэтээтэ.
Тэрилтэҕэ быһаарбыттарынан, Арассыыйа Федерациятын сокуона сыл устатыгар хомунаалынай өҥөнү тэҥник төлүүр кыаҕы биэрэр. Маннык түгэҥҥэ ититии төлөбүрэ 12 ыйга, ол иһигэр сайыҥҥы кэмҥэ эмиэ тарҕанар.
«Теплоэнергосервиска» чуолкайдаабыттарынан, ыйдааҕы төлөбүр — бу ханнык эмэ ыйга тиэрдиллибит сылааһы төлөөһүн буолбатах, бүтүн оттук сезонун устатыгар өҥө уопсай сыанатын сорҕото. Маннык ньыма кыһыҥҥы кэмҥэ, сылааһы туһаныы биллэ улаатар кэмигэр, үп-харчы ноҕуруускатын намтатарга көмөлөһөр.
Хампаанньа даннайынан, Саха сирин уһун уонна тыйыс кыһыннаах усулуобуйатыгар төлөбүрдэри тэҥник үллэрии өрөспүүбүлүкэ олохтоохторугар ититии ороскуотун эмискэ үрдээһинин тумналларыгар уонна дьиэ кэргэн бүддьүөтүн ордук көдьүүстээхтик былаанныылларыгар көмөлөһөр.
«Теплоэнергосервис» пресс-сулууспатыгар ону таһынан сылы эргиччи ититии технологическай процеһа тохтооботун санаттылар. Сыл устата тэрилтэ оттук сезонугар бэлэмнэнэр, оборудованиены техническэй көрүүнү-истиини ыытар, былааннаах уонна саахал-чөлүгэр түһэрэр үлэлэри толорор, систиэмэ эрэллээх буоларын хааччыйар.
«Теплоэнергосервиска» эппиттэринэн, хомунаалынай өҥөлөрү кэмигэр төлөөһүн оттук сезонун эрэллээхтик аһарыыга уонна ититии систиэмэтин туруктаахтык үлэлэтиигэ сүрүн фактордарынан буолар.
Санатан эттэххэ, 2026 сылга Саха сиригэр сайыҥҥы өттүгэр хомунаалынай тарыыптары үрдэтии суох буолуоҕа. ЖКУ төлөбүрүн сүрүн индексацията алтынньыга көспүтэ.
