Кэбээйи оройуонугар Олоҥхо һыаҕа түмүктэннэ. Түмүк күн сүрүн түгэнинэн, от ыйын 5 күнүгэр, «Мүлдьү Бөҕө» театрализованнай көрдөрүү буолла. Үс күннээх бырааһынньыкка 40-тан тахса культурнай уонна спортивнай тэрээһин буолан ааста. XIX Олоҥхо Ыһыаҕа, Саха сирин баһылыга Айсен Николаев биллэрбит, эпос үһүс уон сылын арыйда уонна Кэбээйи улууһун историятыгар саамай улахан событие буолла.
Түмүктүүр көрдөрүү Кэбээйи олоҥхоһута Иван Николаев — Куоҕас Уйбаан матыыптарынан тэрилиннэ.
Уһун Хонуу ытык сиригэр уус-уран оҥоһуулар быыстапката, олоҥхону толорооччулар, оһуохайы толорооччулар, музыкааннар, хомус, саха быһаҕын, ох саатын, батыйаны, ювелирнай оҥоһуктары, национальнай таҥаһы-сабы, иһити-хомуоһу оҥорооччулар куонкурустара буолла. Хотугу аҕыйах ахсааннаах норуоттар ортолоругар айар куонкурустар уонна эпос толорооччулар куонкурустара буолан ааста. Ыалдьыттарга саха норуоттарын испэктээктэрин, былыргы сиэрин-туомун көрдөрдүлэр.
Спортивнай бырагыраама спорт аҕыс көрүҥэр күрэхтэһиилэри киллэрэн, 300-тэн тахса спортсмены, ол иһигэр «Дыгын Оонньууларын» сулустарын түмтэ. Биир дьоһун түгэнинэн «Аан дойду норуоттарын эпостара» аан дойдутааҕы бырайыак презентацията буолла — сэттэ омук тылыгар сэһэннэр этилиннилэр.
«Үс күн устата ытык сиргэ ЮНЕСКО аан дойдутааҕы шедевринэн билиниллибит баайбыт — Олоҥхо эпоһын иһиттибит. Бу күннэргэ оһуохай үҥкүүтүгэр эргийдибит, ырыа, тойук, өс хоһооннорун, хомус уонна кырыымпа дьүрүскэннэрин иһиттибит. Биһиги тимир уустарбыт саха быһахтарын, батыйаны, хомуһу оҥордулар. Тоҕус оройуон спортсменнара муҥутуур иһин күөн көрүстүлэр. Бу барыта биһиги норуоппут баайа-дуола, маны биһиги элбэтиэхтээхпит», — диэн Саха сирин бырабыыталыстыбатын бэрэссэдээтэлин солбуйааччы Сергей Местников бэлиэтээтэ.
Олоҥхо ыһыаҕын үөрүүлээх сабыллыытыгар өрөспүүбүлүкэтээҕи куонкурустар, күрэхтэһиилэр кыайыылаахтарын наҕараадалааһын сиэрэ-туома ыытылынна.
“Эр Бэрдэ” национальнай многоборье кыайыылаахтарынан буоллулар:
1 миэстэ уонна 250 тыһыынча солкуобай — Владимир Михайлов, Таатта оройуона;
2 миэстэ уонна 150 тыһыынча солкуобай — Владимир Федоров, Ньурба оройуона;
3 миэстэ уонна 100 тыһыынча солкуобай — Дьулустан Ноговицын, Горнай оройуона.
Куонкурус түмүгүнэн бастыҥ хомусчутунан Бүлүү оройуонуттан Эльза Данилова билинилиннэ. Кыайыылаахха үрүҥ көмүс хомуһу туттардылар. Оһуохай бастыҥ таһаарааччытынан Таатта улууһуттан Айта Васильева уонна Бүлүү оройуонуттан Семен Менкяров буоллулар. Кинилэргэ 30-нуу тыһыынча солкуобайы туттардылар.
Олоҥхону толорооччулар ортолоругар кыайыылаахтары үс категорияҕа быһаарылыннылар:
оҕолор ортолоругар Нам оройуонуттан Юрий Мордовской бастыҥынан билинилиннэ — 100 тыһыынча солкуобай сертификат;
ыччат ортотугар Бүлүү оройуонуттан Саина Шамаева кыайда – бирииһэ 300 тыһыынча солкуобай харчы;
700 тыһыынча солкуобайдаах бириис куонкурус Гран-при кыайыылааҕар Мэҥэ Хаҥалас оройуонуттан Виталий Никифоровка туттарылынна.
Олоҥхо ыһыаҕын Ытык бэлиэтэ Ытык Дуоҕа Ленскэй оройуонун делегациятыгар үөрүүлээхтик туттарылынна. Онно 2027 сыллаахха Олоҥхо ыһыаҕа тэриллиэҕэ.
Санатан эттэххэ, Олоҥхо ыһыаҕа национальнай бырааһынньыга от ыйын 4 күнүгэр Саха сирин Кэбээйи оройуонугар аһыллыбыта. Сиэргэ-туомҥа үгэс быһыытынан Алгыс сиэрин-туомун, Айыылары аһатыыны ыытылынна, Ытык Дуоҕа өрө көтөҕүлүннэ, театрализованнай көрдөрүү биһирэннэ уонна оһуохай үҥкүүлэннэ. Бырааһынньык ыалдьыттарын Саха сирин баһылыга Айсен Николаев эҕэрдэлээтэ.
