От ыйын 21–22 күннэригэр Өлүөнэ өрүскэ Табаҕаттан Дьокуускайга диэри учаастагар уу анал бэлиэни аһара барыыта күүтүллэр. Бу туһунан от ыйын 19 күнүнээҕи Саха сирин ууларын туруктарын туһунан УГМС биллэриитигэр иһитиннэриллэр.
Киин оройуоннарга Покровскай – Дьокуускай – Кангалас учаастагар уу таһыма сууккаҕа үрдээһинэ 25 см-тан 75 см диэри буолла. Чугастааҕы икки сууккаҕа үрдээһин тэтимэ 0,6–1,0 м тиийиэн сөп, сорох ходуһаны уу ылыан сөп.
Ленскэй – Саҥыйахтаах учаастагар уу таһыма салгыы 20 см-тан 120 см диэри сууккаҕа үрдүү турар, Ленскэй аттыгар ардах халаана муҥутуур чыпчаалынан 5,6 м долгун үрдүктээх ааһар.
Өлүөхүмэ өрүскэ Куду-Күөл гидропостка ардах халаанын муҥутуур чыпчаала 5,7 м уопсайынан үрдээһининэн биллэр. Алдан өрүскэ Суон-Тиит – Уус-Миил – Хаандыга учаастагар уу таһыма 0,1 м-тан 1,2 м диэри сууккаҕа үрдүү турар. Чугастааҕы сууккаҕа үрдээһин салҕаныа: Суон-Тиит – Чагда учаастагар 0,5 м-тан 2,0 м диэри, Уус-Миил – Кириэс Халдьаайы — 0,3 м-тан 1,0 м диэри. Учур өрүскэ Чүлбү гидропостка (Алдан оройуона) сууккаҕа үрдээһин 2,7 м тиийдэ, ардах халаана салҕанар.
Дьааҥы өрүскэ Үөһээ Дьааҥы – Баатаҕай учаастагар уу таһыма 0,3 м-тан 0,9 м диэри сууккаҕа намтыыр, намтааһын салҕаныа. Сайдыы гидропоһугар 0,8 м үрдээһин бэлиэтэннэ — бу Адыаччы өрүстэн халаан долгуна кэлбитин кытта сибээстээх. Дьааҥы салааларыгар — Томтор аттыгар Дулҕалаахха уонна Уус-Чаркы аттыгар Адыаччыга — ааспыт ардахтар содулларыгар уу таһыма 0,4 м-тан 1,7 м диэри сууккаҕа үрдүүр.
Бытантай уонна Сартаҥ өрүстэргэ чугастааҕы икки сууккаҕа ардах халаана саҕаланыыта күүтүллэр. Индигир өрүс устатын тухары уу таһыма 3 см-тан 17 см диэри сууккаҕа намтыыр. Зырянка бөһүөлэгин аттыгар Халыма өрүскэ уу таһыма сууккаҕа 35 см үрдээтэ, чугастааҕы сууккаҕа 5–10 см эбиллэрэ күүтүллэр.
