Үөһээ Дьааҥы улууһугар халаан туруга бигэтийдэ: Дьааҥы өрүс уутун таһыма нуормаҕа төнүннэ уонна кутталлаах бэлиэлэртэн аллараа турар. Арассыыйа ЫБММ Саха сиринээҕи быыһааччылара сүрүн саахалы туоратар-чөлүгэр түһэрэр үлэлэрин түмүктээтилэр, диэн биэдэмистибэ иһитиннэрдэ.
Суордаахха, Томторго уонна Верхоянскайга хоромньуну ааҕар сыаллаах хамыыһыйалар үлэлэрэ салҕанар. Бэҕэһээ ЫБММ бөртөлүөтэ Сайдыыга, Суордаахха уонна Томторго 5,5 туонна таһаҕаһы тиэйэн аҕалбыта. Уопсайынан эмсэҕэлээбит улуустарга 20-тан тахса туонна гуманитарнай көмө ыытылынна. Нэһилиэнньэлээх пууннар бородууктанан уонна эминэн хааччылыннылар.
«Бары нэһилиэктэр олохтоохторугар тус сыаллаах көмө оҥоһулунна: ууну оборторуу, алдьаммыт муосталары көтүрүү, буор дамбалары тутуу уонна эвакуация ыытылынна. Сир-уот барыта ыраастанна», — диэн СӨ ЫБММ кылаабынай управлениетын начаалынньыгын э.т. Виталий Немцов бэлиэтээтэ.
Турук мөлтүүр түбэлтэтигэр анаан 90 киһилээх уонна 11 тиэхиньикэлээх аэромобильнай бөлөх бэлэм турар.
