Саха сиригэр Мария Шахова ыытааччылаах «Мы и Они» диэн документальнай бырайыак саҥа таһаарыытын устуута түмүктэннэ. Москваттан Арассыыйа хоту өттүгэр — бу сырыыга Алдан оройуонугар, тайҕаҕа, эбээннэргэ тиийэ тыһыынчанан килэмиэтири айаннаабыттарын бырайыак пресс-сулууспата иһитиннэрэр.
Таһаарыы дьоруойунан Сэмиэн Ду буолла. Кини хоту көһөн кэлэн баран, күндү тааһы хостуур дьарыктаах. Таһаарыыга кини Саха сирин чиэһинэйин уонна кэрэтин иһин талбытын, олохтоох климатка хайдах үөрэммитин, ону сэргэ манна бэйэтин дьыалатын булан, бу дойдуну билигин төрөөбүт дойдутун курдук саныырын туһунан кэпсиэҕэ.
Мария Шахова бырайыага атын омук хараҕынан Арассыыйаны көрдөрөр, олохторун тухары биһиги дойдубутугар олорорго санаммыт дьону кытта кэпсэтэр. Ыытааччы дьоруойдарыныын култууралар майгыннаһар өрүттэрин уонна уратылаһыыларын, уларыйбат сыаннастары уонна эрэгийиэни талалларыгар дьайбыт биричиинэлэри ырытыһар.
