Ааспыт ыйга от ыйын 23 күнүгэр Үөһээ Дьааҥы улууһугар аан бастаан халаан уута улуус кииниттэн 200 км. сытар Усуйаананы кытта ыаллаһа олорор саамай хотугу Сайдыы нэһилиэккэ киирбитэ. Онтон сарсыныгар-өйүүнүгэр Дулҕалаах, Суордаах, салгыы Боронук эмсэҕэлээбиттэрэ. Ол түмүгэр Сайдыы 80%, Суордаах, Боронук 100%, Дулҕалаах 90%, Верхоянскай куорат 60% ууга бардылар. Оҕолору, кырдьаҕастары, дьахталлары улуус киинигэр бөртөлүөтүнэн эвакуациялаабыттара, суруйда Саха парламент саайт.
Ону истээт даҕаны Дьокуускай куоракка Дьааҥылар түмсүүлэрэ СӨ Ыччатын уонна социальнай коммуникацияҕа министиэристибэтин иһинэн «Патриот» ресурснай киин Орджоникидзе уулусса 10 №-дээх дьиэтигэр штаб тэрийэн, гуманитарнай көмө хомуйуутун саҕалаабыттара.
«Улуус кииниттэн тэйиччи сытар, суола-ииһэ суох Сайдыыга, Суордаахха 1,5 туонна таһаҕаһы бөртөлүөтүнэн ыыппыппыт. Атырдьах ыйын 3 күнүнээҕи туругунан 10 туонна гуманитарнай көмөнү хомуйдубут. Баатаҕайга икки сөмөлүөтүнэн ыччат тутар этэрээттэрэ уопсайа 60-ча киһи көмөҕө бардылар, ону кытта 2 туонна таһаҕаһы ыыттыбыт. Атырдьах ыйын 4 күнүгэр өссө 1,5 туоннаны Дулҕалаахха, Суордаахха ыыттыбыт.
Бөртөлүөт лааҕырга барыахтаах оҕолору Баатаҕайга илдьэр, ууга барбыт тыалартан кэлбит оҕолору сөмөлүөт манна Дьокуускай куоракка аҕалар. Биир дойдулаахтарбыт уонна өрөспүүбүлүкэ олохтоохторо атырдьах ыйын 4 күнүгэр диэри 3,1 мөл. солк. көмө харчыны ыыттылар. Киэһэ аайы төһө харчы киирбитин ааҕабыт уонна ууга барбыт нэһилиэк баһылыктарыгар эрийэн, туох наадатын ыйытабыт. Үксүн носуос, пуомпа, сууккаҕа сиртэн 15 лиитэрэ ууну хомуйар, куурдар тэрил, шланга наада, ону барытын ылан ыыта сатыыбыт», — диэн Ольга Борисовна Прудецкая, Дьокуускай куоракка Дьааҥылар түмсүүлэрин салайааччыта кэпсиир.
Кини куоракка Дьааҥылар элбэхтэрин, нэһилиэктэр бэрэстэбиитэллэрэ баалларын бэлиэтиир. Ил Түмэн дьокутаата, Үөһээ Дьааҥы Сайдыы нэһилиэгиттэн төрүттээх Сергей Сивцев хара маҥнайгыттан штабы тэрийэргэ, дьону түмэргэ үлэлэһэр. Гуманитарнай көмө туһунан ыҥырыы таһааран, норуот дьокутааттара 20 000 – 50 000 солк. ыыттылар.
СПИД-киин эмиэ харчы, матырыйаал хомуйан, Өрөспүүбүлүкэтээҕи балыыһаттан эми-тому штабка тиксэрдилэр, улуустартан саамай бастакынан Горнай улууһун дьаһалтата икки массыынанан бородуукта, таҥас-сап аҕалла. Маҥарас нэһилиэгин баһылыга Владимир Текеянов бэйэтэ кэлэн, 480 киилэ аһылыгы, таҥаһы-сабы киллэрэн биэрдэ.
«Тутуу ырыынагын салайааччытыттан норуот дьокутаата Иван Даниловтан көрдөспүппүтүн көмөлөһөөччүтэ туох наадатын булан биэрдэ. Биирдиилээн дьон 50 000 – 100 000 солк. ыыттылар, Саха НКИХ ыҥырыы таһаарбыппыт кэнниттэн дьон көмөтө биллэрдик элбээтэ. Тугу көмөлөһөбүтүй? — диэн эрийэн ыйыталлар.
Биһиги харчынан көмө ордук диибит, 10 туонна бородуукта кэлэн турар, ону ыытарга кэккэ уустуктар бааллар. Өрөспүүбүлүкэ сибилигин харчыта суох, тутуу этэрээттэрин кытта ыыта сатыыбыт. Таһаҕаспыт аһары элбээн хааллаҕына кыайан ыытыа суохпут. Оборудование атыылаһан ыытарбыт ордук туһалаах буолуон сөп», — диир Ольга Борисовна.
