Атырдьах ыйын 4 күнүгэр Саха Өрөспүүбүлүкэтин Бастакы Бэрэсидьиэнэ Михаил Ефимович Николаев олохтон туораабыта чопчу үс сыла туолар. Кини 86 сааһыгар күн сириттэн күрэнэн, өрөспүүбүлүкэбит туохха да тэҥнэммэт ыар сүтүгү көрсүбүтэ, суруйда Саха сирэ саайт.
Аан дойду таһымнаах судаарыстыбаннай уонна бэлиитичэскэй диэйэтэлэ, Саха Өрөспүүбүлүкэтин төрүттээччи уонна Бастакы Бэрэсидьиэнэ Михаил Николаев Улуу Арассыыйа састаабыгар аныгы Саха сирин тутууга сүҥкэн кылааты киллэрбит, норуотун инники күөҥҥэ сирдээбит муударай салайааччы этэ. Итиэннэ кини биир дойдулаахтарыгар, хас биирдии саха киһитигэр олус чугас, истиҥ уонна төрөппүт аҕа кэриэтэ убаастанар киһинэн буолара.
Кини көҕүлээбит уонна олоххо киллэрбит өйүктэрэ Саха сирин дьылҕатын быһаарар, сайдыыга саҥа суолу тэлэр сүҥкэн суолталаммыттара. Ол курдук, ырааҕы өтө көрөр муударай быһаарыыларыттан биирдэринэн — Саха Өрөспүүбүлүкэтин Бэрэсидьиэнин иһинэн Каадыры бэлэмниир департамент тэриллиитэ буолбута. Бу тэрилтэ Арассыыйа уонна тас дойдулар 350-тан тахса үрдүк үөрэх кыһаларын кытта ситимнээхтик, бииргэ үлэлээбитэ. Оттон департамены уопуттаах судаарыстыбаннай диэйэтэл Матвей Васильевич Мучин салайан үлэлэппитэ.
Михаил Ефимович бу ырааҕы көрүүтүнүн уонна дьоһун дьаһалынан тыһыынчанан саха ыччата аан дойду бастыҥ үөрэхтэрин ылан, төрөөбүт дойдуларын сайдыытыгар туһалыыр кыахтаммыттара. Кини биһиэхэ дьиҥнээх сырдык кэскили бэлэхтээбитэ, ол кэскилбит билигин даҕаны Сахабыт сирин сайыннара, тупсара туруоҕа.
