Маҥнайгы түһүмэххэ сурутуу түмүгүнэн, Саха сиригэр 11 тыһыынчаттан тахса маҥнайгы кылаас үөрэнээччитэ оскуолаҕа ылылынна. Кинилэр 2026–2027 үөрэх дьылыгар үөрэнэн саҕалыахтара. Иккис түһүмэх чэрчитинэн төрөппүт олорор аадырыһын учуоттаабакка сайабылыанньа биэриэн сөп, балаҕан ыйын 5 күнүгэр диэри салҕаныаҕа.
«Өрөспүүбүлүкэҕэ маҥнайгы кылаастарга оҕолору ылыы бастакы түһүмэҕэ түмүктэннэ. 11 тыһыынчаттан тахса маҥнайгы кылаас үөрэнээччитэ миэстэтин булла. Сайабылыанньа 94%-на «Госуслуги» нөҥүө киирдэ. От ыйын 1 күнүттэн саҕаламмыт иккис түһүмэххэ, миэстэ баар оскуолаларыгар олорор аадырыһынан буолбакка, ылыы ыытыллар. Ордук уочарат Дьокуускай куоракка бэлиэтэнэр, ол да буоллар киин куораппытыгар өссө да маҥнайгы кылаастарга оҕолору ылар оскуолалар бааллар. Ылыы хампаанньата балаҕан ыйын 5 күнүгэр диэри барар», — диэн СӨ Үөрэҕин уонна наукатын миниистирэ Ньургуйаана Соколова бэлиэтээтэ.
2025–2026 үөрэх дьылыгар өрөспүүбүлүкэҕэ 709 оҕо уһуйааныгар 61 тыһыынчаттан тахса иитиллээччи сылдьыбыта, оттон 627 үөрэх тэрилтэтигэр 150 тыһыынчаттан тахса оскуола оҕото үөрэммитэ.
