Сунтаар улууһун күөлүгэр хайа хааһа ол эбэтэр Индия хайатын хааһа диэн ааттанар икки хаас ааспыт нэдиэлэ бүтүүтэ дьаарбайдылар.
Ураты көтөрү олохтоохтор интэриэһиргээн көрдүлэр.
«Нууччалыыта горный гусь, эбэтэр индийский горный гусь дэнэр. Сунтаарбытыгар кэлэн ыалдьыттыы сылдьаллар. Орто Азия хайаларыгар төрүүр-ууһуур отой сэдэх хаас. Кыһыл кинигэлэргэ барыларыгар баар. Көрдөһүөм этэ, сойуолаһымаҥ! Кэрэ Сунтаарбыт айылҕатын эбии мааны киэргэллэрэ буолан сылдьа түстүннэр. Ууһуур саастарыгар тиийэ илик буоланнар, көҥүл сылдьаллар буолуохтаах. Биһиэхэ хаһыс да төгүлүн кэлээһиннэрэ. Хата атын дойду хаастарыгар сахалыы аатта толкуйдуоххайыҥ», — диэн Элгээйитээҕи айылҕа түмэлин дириэктэрэ Анна Иванова ыҥырыы оҥордо.
Кини эппитинэн, хайа хаастарын уопсастыбаннай эколог Максим Афанасьев хаартыскаҕа түһэрдэ.
