Томпо оройуонугар Алдан өрүстэн уонна Илиҥҥи Хаандыга үрэхтэн булуллубут буукуба таастар тустарынан СИА-ҕа Евдокия Неустроева кэпсээтэ.
Айылҕа дьиктитэ элбэх уонна араас. Холобура, киһи ойуулаабытын эбэтэр оҥорбутун курдук буукуба таастар баалларын буллум. Томпо оройуонугар Илиҥҥи Хаандыга үрэх кытылыттан булуллубут таастар буукубалары санаталлар. Холобура, кылгас уонна уһатыылаах «О»-ҕо майгынныыллары ылан көрүөххэ.
Бу уруһуй буолбатах, таас бэйэтин өҥө-ойуута. Уопсайынан ылан көрдөххө, «О» буукубаны санатар ойуулаах таастары син элбэҕи булуохха сөп. Кыралары да, улахаттары да.
2024 сыллаахха Алдан өрүс кытылыттан «С» буукуба бэлиэлээх тааһы булбутум. Улахан уонна ыарахан буолан көрбүт сирбэр хаалларбытым. Икки хонон баран, бу манан сытар буолуохтаах диэн тиийэн, элбэх таас быыһыттан чопчу булан ылбытым уонна сүгэн дьиэбэр илдьэ кэлбитим. Быһа барыллаан, балтараа киилэ ыйааһыннаах. Буукуба тула кугас ойуутун быһыыта хайдах эрэ табыгы дуу, дүҥүрү дуу санатар.
Оттон манна көстөр икки атын таастар быһыылара буукубалар курдуктар. Кээмэйдэрэ син обургу. «Г» уонна «С» буукубалар буолаллара мунааҕа суох көстөр.
