Балаҕан ыйын 24 күнүгэр буолбут быһа эпиир кэмигэр Ил Дархан Айсен Николаев дьадайыыны утары охсуһуу миэрэтин быһыытынан, социальнай хантараактары биэрии бырагырааматын өссө күүһүрдүөхпүт диэн эттэ.
— Социальнай хантараагы биэрии бырагырааматын күүһүрдэргэ сүүһүнэн мөлүйүөн солкуобай көрүллэн турар. Биһиги дьоҥҥо көннөрү харчыны эрэ биэрбэккэ, үлэлиир-хамсыыр, дохуоттанар кыаҕы биэриэхтээхпит. Социальнай хантараак көмөтүнэн бэйэ дьыалатын арыныахха, бэйэ хаһаайыстыбатын сайыннаран, дохуоттаныахха сөп. Онон бу бырагыраама дьиэ кэргэҥҥэ олус суолталаах. Төрөппүттэрэ үлэлээх, дьарыктаах, хаһаайыстыбалаах буоллахтарына, оҕолорун эмиэ үлэҕэ үөрэтэллэр, сөпкө иитэллэр, — диэн кини эттэ.
Маны тэҥэ, Айсен Николаев социальнай хантараак эдэр дьоҥҥо эрэ буолбакка, биэнсийэлээхтэргэ эмиэ бэриллэрин туһунан санатта.
Социальнай хантараак — «Демография» национальнай бырайыак чэрчитинэн үлэлиир бырагыраама. Бэйэ дьыалатын арыныыга 500 тыһыынча солкуобайга тиийэ биэрэллэр. Маны тэҥэ, кэтэх хаһаайыстыбаны сайыннарыыга, идэ ылан үөрэнэргэ, үлэ буларга, ыарахан балаһыанньаттан тахсарга көмө быһыытынан бэриллэр.
Ангелина Васильева, Саха сирэ
