Хотугулуу-Илиҥҥи федеральнай университет Историческай факультетыгар Казахстан өрөспүүбүлүкэтигэр баар Л.Н. Гумилев аатынан Евразиятааҕы Национальнай университет археология уонна этнология кафедратыттан икки магистр уолаттар стажировкалана кэллилэр.
Маҥнайгы куурус магистрдара Аскар Нурмаханов уонна Беркут Жанпеисов түөрт ый устата Саха сиригэр олоруохтара.
Бу кэм устата уолаттар ХИФУ-га маҥнайгы сылларын үөрэнэ сылдьар магистраннары кытары бииргэ историческай факультет биллиилээх уһуйааччылара, профессордара А.И. Гоголев уонна В.Г. Аргунов лиэксийэлэрин истиэхтэрэ, ону тэҥэ, бакалаврдар лиэксийэлэригэр эмиэ сылдьыахтара.
Устудьуоннар билими чинчийэр “Култуурунай Антропология” куруһуоктарын чэрчитинэн билиһиннэрэр сыаллаах мунньах ыытылынна, онно ыраахтан кэлбит магистраннар казах археологиятын уонна этнологиятын туһунан олус интэриэһинэй лиэксийэни оҥордулар, ону тэҥэ, саха устудьуоннарбытын кинилэр университеттарыгар ыытыллар экспедицияларга, конференцияларга уонна олимпиадаларга кыттыыны ыларга ыҥырдылар.
