Саха сирин баһылыга Айсен Николаев от ыйын 27 күнүнээҕи мунньахха бырабыыталыстыба бастакы уочараттаах соруктарын быһаарда. Олор ортолоругар халаан уутун уонна ойуур баһаарын содулларын туоратыы, тохтоло суох хотугу тиэйии, Саха сирин соҕуруу өттүн уматыгынан хааччыйыыны туруктаах оҥоруу уонна учууталлары өйүүр эбии дьаһаллары бэлэмнээһин боппуруостара көрүлүннүлэр, суруйар Саха сирэ саайт.
Эрэгийиэн салайааччыта Өлөөн оройуонун Ээйик сэлиэнньэтин аттыгар ойуур баһаарын умуруорууга ураты болҕомтотун уурда.
—Күүстэр улахан бөлөхтөрө тэрилиннэ, минерализованнай балаһалары оҥорууга суһал дьаһаллар ылылыннылар. Ити барыта сотору кэминэн бу ойуур баһаарын суох оҥорорго кыаҕы биэриэ, — диэтэ Айсен Николаев. Өрөспүүбүлүкэ баһылыга халаан уутугар туспа тохтоото. Айсен Николаев ордук уустук балаһыанньалаах Верхоянскай оройуона, ардахтан халаан уута таарыйбыт Суордаах сэлиэнньэтэ буоларын эттэ. Ил Дархан олохтоохтору наадалаах аһынан-үөлүнэн хааччыйарга уонна уу намтаабытын кэнниттэн чөлүгэр түһэрэр үлэни тэрийэргэ сорудахтаата.
Итини сэргэ, «Халыма» федеральнай массыына суолун оҥоро охсон, айаны-сырыыны чөлүгэр түһэрэр сорук туруорулунна.
Сылааһы биэриигэ бэлэмнэнии үлэтэ эмиэ көрүлүннэ. Айсен Николаев Саха сирин соҕуруу өттүн уматыгынан хааччыйыыны туруктаах оҥорорго, саппааһы чөлүгэр түһэриигэ урут ылыллыбыт быһаарыылары олоххо киллэрии наадатын бэлиэтээтэ.
Маны таһынан мунньахха саҥа федеральнай быһаарыылары олоххо киллэрии боппуруостарын көрдүлэр. Айсен Николаев бырабыыталыстыбаҕа РФ Бэрэсидьиэнэ Владимир Путин 2026 с. от ыйын 20 күнүнээҕи ыйааҕын толоруу чэрчитинэн, педагогтары өйүүр эбии дьаһалларга этиилэри бэлэмнииргэ соруйда.
Сиһилии: https://www.sakha.gov.ru/news/57695
СӨ Ил Дарханын уонна Бырабыыталыстыбатын пресс-сулууспата
