Кэбээйи оройуонугар халаан уутуттан эмсэҕэлиэн сөптөөх түөрт нэһилиэнньэлээх пуун баар — Батамай, Сииттэ, Арҕас уонна Сангаар. Ол туһунан улуус баһылыгын э.т. Александр Сивцев иһитиннэрдэ.
«Барыта 11 быстах олорор пуун тэрилиннэ, уопсай миэстэтэ 530. Сүөһү, сылгы үүрэр миэстэлэр быһаарылыннылар. Ас-үөл таһыыга дуогабардар түһэрсилиннилэр. Дьуһуурустуба олохтонно», — диэтэ салайааччы.
Олохтоохтору болҕомтолоох буоларга уонна суһал иһитиннэриилэри кэтээн сылдьалларыгар этилиннэ.
Өлүөнэ эбэ мууһа Кэбээйи оройуонун туһаайыытынан кэлэр сууккаҕа ааһара күүтүллэр. Уу таһыма кутталлаах бэлиэни куоһарыан сөп. Намыһах сиргэ турар учаастактарга уу киирэр куттала баар.
