22 От ыйа 22.07
  • 26°
  • $ 88,02
  • 96,04

Хадаар оскуолатын үөрэнээччилэригэр анаан агроробот оҥоһулунна

12:01, 30 мая
Текст:
Читайте нас на
Яндекс Новости
ЯДВ

Ыам ыйын 27 күнүгэр Арктикатааҕы агротехнологическай университет ректора Валерий Федоров уонна Чурапчы улууһун Семен Флегонтов аатынан Хадаар орто оскуолатын дириэктэрэ Петр Тарасов “Робомех” үөрэтэр агророботы туттарар-ылар аактаҕа илии баттастылар. Агророботы университет инженернэй бакылтыата билим-чинчийэр оскуола иитинэн оскуола сакааһынан оҥордулар диэн АГАТУ пресс-сулууспата иһитиннэрэр.

Бырайыак ааптардара иһитиннэрбиттэринэн, “РобоМЕХ” үөрэтэр нобуор орто үөрэх тэрилтэлэрин роботехническэй куруһуоктарын хааччыйар, ону тэҥэ, “Кубок РТК АГРО”, “АгроНТРИ” уо.д.а. ыччат роботехническэй күрэстэригэр кыттарга аналлаах буолар эбит. Саҥа көрүҥ көмөтүнэн эдэр тиэхиньиктэр конструирование, электроника, программирование эйгэтигэр ылбыт билиилэрин быраактыкаҕа киллэрэн көрөргө үөрэнэллэр.

“Агро хайысхалаах оскуолаларга эрэгийиэннээҕи күрэхтэһии ыытыллыахтаах ол кэнниттэн өрөспүүбүлүкэҕэ үчүгэй көрдөрүүлээх оскуолалар Илин уһук федеральнай уокуругар кытта барар чиэскэ тиксиэхтэрэ. Итининэн сибээстээх “АгроНТРИ” диэн күрэхтэһии биир сүрүн көрүҥүнэн буолар. Бу робот көмөтүнэн оҕолорбут автомотизированнай о.э. тыа хаһаайыстыбатыгар туһаныллар үнүстүрүмүөннэри, аныгы технологияҕа сөп түбэһиннэрэн хортуоппуйу олордуу, сири хорутуу, урулуоннаах оттору дьаарыстыырга  — аныгы олох ирдэбилинэн тыа хаһаайыстыбатын кэмпитиэнсийэлэригэр итинник роботтар көмөлөрүнэн күрэх буолуохтаах. Теориетическай чаас кэнниттэн практическай чааһа бу бэс ыйыгар ыытыллыахтаах. Ол онно туһаайыллан сүрүн түһүмэххэ агророботтарынан кыттыахтара”, — диэн Хадаар оскуолатын дириэктэрэ Петр Петрович кэпсээтэ.

Роботтар IoT технологияҕа көхтөөхтүк туһаныллар биир киэҥник тарҕаммыт эбийиэгинэн буолаллар. “РобоМЕХ” үөрэх нобуора программалааһын, конструирование, мехническай уонна электрическэй таҥыы сатабылларын сайыннарар. Тустаах нобуор эбии датчиктары уонна толорор тэрили холбуур кыахтаах, онон сатабылы үрдэтэр.

“Агроробот үөрэнээччилэр тыа хаһаайыстыбатын механизированнай үлэтинэн умсугуйалларыгар көмөлөһүөҕэ, АгроНТРИ Бүтүн Арассыыйатааҕы күрэскэ кытталларыгар сатабылларын үрдэтэллэригэр эрэллээхпит” – диэн АГАТУ ректора Валерий Федоров этэр.

Ааптар: Сэмэн Жендринскэй, Саҥа олох хаһыат

Следите за самым важным и интересным в Telegram-канале и WhatsApp-группе ЯСИА