Бэҕэһээ дойдуга Фрилансер күнэ. Арассыыйаҕа 2005 сыллаахха аан бастаан фрилансердар биржалара тэриллибитэ.
Саха сиригэр фрилансердар ахсааннара эмиэ элбээн эрэр. Ордук оҕолоругар олорор араас идэлээх ийэлэр бэйэлэрин кыахтарын туһанан уруһуйдуур, ас астыыр, кинигэ суруйар, тылбаастыыр өҥөнү оҥороллор. Маныаха кинилэр социальнай ситимнэри хото туһаналлар. Мин фрилансер Вероника Александрова-Эрэлкээнэ санаатыгар иитиэхтии сылдьыбыт бырайыагын хайдах олоххо киллэрбитин туһунан билиһиннэриим.
Вероника Александрова үөрэҕин бүтэрээт, “Киин куорат” хаһыат суруналыыһынан үлэлии сылдьыбыт. Онтон утуу-субуу оҕолонон, кырачааннарыгар олорбут. Биллэн турар, түөрт уол оҕо ийэтэ өр кэмҥэ үлэтэ суох олорон туоххаһыйара ханна барыай?
— Ол оннук чуҥкуйар кэммэр ютубка араас лиэксийэлэри истэр буолбутум. Истэр тиэмэм – бэйэ кыаҕын хайдах туһаныахха, көҥүллүк сылдьан араас өҥөнү оҥорон, хамнастаныахха диэн. Сотору кэминэн миэхэ идиэйэ үөскээн таҕыста – саҥа төрөөбүт оҕоҕо аналлаах альбом оҥорор эбиппин диэн. Мин кэргэммин кытта сүбэлэһэр инниттэн: “Маннык гыныам, итинник гыныам”, — диэн идиэйэбин кэпсээн бөҕө буоллум. Киһим болҕомтолоохтук истэн баран: “Бээ, бу идиэйэҕин олоххо киллэрэргэр харчы наада эбээт. Ону хантан булаҕын?” – диэтэ. Мин:”Кырдьык даҕаны…” – диэн санаам түһүөх курдук буолбутугар:
— Санаарҕаама. Спонсордары көрдүөхпүт, — диэн уоскуппута.
Ити курдук, санааларын түһэрбэккэ, Александровтар бэйэ бородууксуйатын оҥорон таһаарар олохтоох урбаанньыттартан идиэйэлэрин олоххо киллэрэллэригэр өйүүргэ көрдөспүттэрэ.
— Дьиктиргиэм иһин, кэпсэппит дьонум уу харчынан ууран биэрэн, идиэйэбин — «Айыы оҕото» диэн альбоммун олоххо киллэрдим, — диэн кэпсиир фрилансер.
Бу күннэргэ 600 ахсаанынан «Айыы оҕото» диэн холбуйалаах альбом Новосибирскайга бэчээттэнэн, оҥоһуллан кэлэн, атыыга тарҕанна.
Фрилансер, түөрт оҕо тапталлаах ийэтэ Вероника Александрова-Эрэлкээнэ саха оҕото төрүөҕүттэн үс сааһыгар диэри улаатарын кэрдиис кэмнэргэ араартаан, ол кэмҥэ сайдыытын, уйулҕатын анааран, кэтээн көрөн, төрөппүттэригэр, эбээлээх эһээтигэр көмө-өйөбүл «Айыы оҕото» диэн альбом-кинигэ бэртээхэй бэлэҕинэн буолуоҕа.
Альбом-кинигэни оҥорууга «Саха сирэ» хаһыат суруйбут дьоруойдара Бурнашевтар дьиэ кэргэн «Күнтэгил» чааһынай уһуйааннара, «Дойдум аһа», «Күн», Наше родное» о.д.а. эт-үүт астарын бородууксуйатын оҥорон таһаарар тэрилтэлэр, араас идэлээх дьон кыттыспыттар.
Вероника Александрова-Эрэлкээнэ холобуругар көрдөххө, Саха сирин фрилансердара бэйэлэрин бырайыактарын олоххо киллэрэн, олохтоох оҥорон таһаарааччылары пропагандалаан, бэйэлэрэ эмиэ бу эйгэҕэ сэмэй кылааттарын киллэрэллэр.
[vc_row][vc_column][vc_message message_box_style=»3d» message_box_color=»grey»]
“Фрилансер” диэн кимий? Бу тиэрмини (freelancer) аан бастаан Вальтер Скотт «Айвенго» арамааныгар көҥүл “копьеносец”, наймыламмыт буойун диэн суолтаҕа туттубут. Аныгы үйэҕэ фрилансердарынан, сүрүннээн, дизайнердар, программистар, менеджердэр, копирайтердар, тылбаасчыттар, суруналыыстар буолаллар. Ол эбэтэр, кинилэр анал штакка киирбэккэ, көҥүл үлэһит буолары ордороллор. Фрилансер сакаасчыттарын бэйэтэ булар, үлэ графигын оҥостор. Ол курдук, дьиэтиттэн тахсыбакка, күнү быһа дьиэтигэр үлэлээн хамнастаныан сөп. Интэриниэт сайдыбыт кэмигэр фрилансер өҥөтүнэн туһанааччы үксээн, маннык көҥүл үлэлээх дьон ахсаана күн-түүн элбии турар. Үлэ биэрээччи да, улахан штаты тутан олорбокко, бэйэлэрин дьыалаларын үчүгэйдик билэр дьон өҥөтүнэн туһанарын ордорор. Онон фрилансер сотору кэминэн саамай наадалаах идэнэн буолара буолуо.
[/vc_message][/vc_column][/vc_row]
