Тыа хаһаайыстыбатын сайдыытын 2025 сылга диэри федеральнайдааҕы бырагырааматыгар түөрт саҥа хос бырагыраама киирдэ, суруйда edersaas.ru Бырагыраамаҕа сүөһү аһылыгын бэлэмнээһин, арыылаах үүнээйилэр силиэксийэлэрин, сүөһү генетикатын уонна винограды үүннэрии салаалара эбиллэллэрин туһунан миниистирдэр кэбиниэттэрин уурааҕа балаҕан ыйын 21 күнүттэн күүһүгэр киирдэ.
Бырагырыыма сүрүн сыала Арассыыйа дойду таһыттан киллэриллэр сиэмэттэн, племенной матырыйаалтан тутулуктамматыгар туһаайыллар. Оччотугар эрэ дойдуга ас-үөл өттүнэн куттал суох буолуута, оттон нэһилиэнньэ үрдүк хаачыстыбалаах, олохтоох бородууксуйанан хааччыллара ситиһиллиэҕэ. Онон 2025 сылга диэри 12,1 мөл туонна эт, 33,8 мөл туонна үүт оҥоһуллуохтаах, 45,3 млрд устуука сымыыт ылыллыахтаах. Ити, биллэн турар, аһылык араас көрүҥүн оҥоһуутун таһымын үрдэтэри ирдиир. Үүнээйиттэн ылыллар арыыны элбэтэргэ подсолнечник, рапс уонна лүөн ыһыылара улаатыахтаах. Онуоха ыһыы сирин кэҥэтэри таһынан, бу култууралар саҥа, олохтоох усулуобуйаҕа сөп түбэһэр сиэмэлэрэ наада. Ити иһин тыа хаһаайыстыбатын сайдыытын бырагырааматыгар «Сүөһү аһылыгын уонна эбииликтэри бэлэмнээһини сайыннарыы», «Арыылаах үүнээйилэр силиэксийэлэрин уонна сиэмэ таһаарыытын сайыннарыы», «Эт боруода ынах сүөһү генетикатын кыаҕын тупсарыы» уонна «Винограды үүннэриини, питомниктары сайыннарыы» диэн хос бырагыраамалар киллэрилиннилэр.
Бырабыыталыстыбаҕа бэлиэтээбиттэрин курдук, хос бырагыраамаҕа кыттарга талыллыбыт кэлим научнай-тэхиньиичэскэй бырайыактары олоххо киллэриигэ федеральнай бүддьүөттэн граннар көрүллүөхтээхтэр.
Ааптар: Раиса Сибирякова, «Саха сирэ», edersaas.ru
