Быйыл уопсайа 1,8 млрд.солк. суумалаах эминэн-томунан, медицинскэй тэриллэринэн чэпчэтиилэринэн туһанааччылары хааччыйыахтара. Манна федеральнай киинтэн 613 мөл. солк., өрөспүүбүлүкэ бюджетыттан миллиардтан тахса солк. көрүллэр.
Доруобуйа харыстабылын миниистирин бастакы солбуйааччы Олег Припузов этэринэн, федеральнай киин икки бырагырааманан бу дьону өйүүр. Бастакы бырагыраамаҕа сэрии, үлэ, блокадалаах Ленинград бэтэрээннэрэ, инбэлииттэр уонна инбэлиит оҕолор киирэллэр. Кинилэргэ 463 мөл.солк. , ол эбэтэр хас биирдиилэригэр ыйга 758 солк. ананыаҕа. Быйыл чэпчэтиинэн туһанааччылар 38% чэпчэтиини харчынан солбуйбуттар.
Элбэх ороскуоттаах 7 нозология ыарыһахтарын федеральнай бюджеттан өйүүллэр. Саха сиригэр маннык ыарыылаах 574 киһи баар. Кинилэри эмтииргэ быйыл 149 мөл.солк. көрүллэр.
Чэпчэтиилэринэн туһанар дьону регионнааҕы өйөөһүн ботуччу соҕуһун миниистири солбуйааччы этэр. Өрөспүүбүлүкэ бюджета 1 миллиард 185 мөл. 36 тыһ.солк. кээмэйдээх үбү-харчыны регионнааҕы үс бырагыраамаҕа ыыппыт.
Тыыл бэтэрээннэригэр, репрессия содулларыттан эмсэҕэлээбиттэргэ, үтүө ааттара эргийбит дьоҥҥо (барыта 2583 киһи) 16,7 мөл.солк. ананар. Россия бырабыыталыстыбатын 890 №-дээх уонна өрөспүүбүлүкэ 144-дээх уураахтарынан, чэпчэтиинэн туһанар 136 тыһыынча киһи 738 мөл.солк. суумаҕа эминэн босхо хааччыллар.
Ураты, ааспат-арахпат, олоххо кутталлаах уонна бэргии турар ыарыылаахтарга үһүс бырагыраама ананар. «Маннык ыарыылаахтары эмтиир сыаната ыарахан. Төһө да дойду экономикатыгар кириисис тыҥаан турдар, бырабыыталыстыба быйыл бэһис сылын маннык дьону хааччыйар. 106 чэпчэтиинэн туһанааччыга 429 мөл.солк. көрүлүннэ. Ити эмтэр бу ыарыһахтар олохторун уһатар», — диир Олег Припузов.
