Хас да хонуктааҕыта буолан ааспыт «Выпускник-2016: За новое село!» форумҥа эдэр дьон бэйэлэрин бырайыактарын былаас бэрэстэбиитэллэригэр, үлэни биэрээччилэргэ билиһиннэрбиттэрэ.
Мичил Егасов Таатта улууһун Даайа-Амматыгар сүөһүн иитэр былааннаах. Кини биир ынахтан 2,5 тоннаҕа диэри үүтү ыыр, 2017 сыл бүтүүтэ 856 81 солк. үбү-харчыны оҥорор соругу туруорунар. Евгения Аксютич Аллараа Бэстээх бөһүөлэгэр дьахтар доруобуйатын киинин аһар баҕалаах.
Бырабыыталыстыба бэрэссэдээтэлэ Галина Данчикова ыччат дойдутун туһугар долгуйарын хайҕаата. «Кинилэр этиилэрин, бырайыактарын сирийэн үөрэтиэххэ уонна эргиччи көмөлөһүөххэ наада. Тыа сирдэригэр сыһыарыллыбыт куратордар үөрэҕи саҥа бүтэрээччилэр бырайыактара олоххо киирэригэр сүбэ-ама, күүс, өйөбүл буолар бэрээдэктэрэ олохсуйохтаах», — диэтэ кини.
Көрсүһүү кэнниттэн кини министиэристибэлэргэ, биэдэмистибэлэргэ сорудах испииһэгин оҥордо. Хас биирдии бырайыакка уопуттаах куратор сыһыарыллар. Математика, информатика институтун бүтэрээччилэр «Саҕалааччы фермер» бырайыактарын тыа хаһаайыстыбатын, ас-үөл политикатын министиэристибэтэ сүрүннүөҕэ.
Филологическай факультеты бүтэрээччилэр Чурапчыга «РЕКПОЛ» рекламнай-полиграфическай өҥөнү оҥорор тэрилтэлэрин — инвестиционнай сайдыыны сүрүннүүр ГБУ. Медицинскэй институту бүтэрээри сылдьар Евгения Аксютич кыыс, дьахтар доруобуйаларыгар аналлаах киинин – доруобуйа харыстабылын министиэристибэтэ.
